ढाका (हाम्रो खेलकुद) – झन्डै पाँच वर्षपछि नेपाली राष्ट्रिय टिममा पूनरागमन गरेका मिडफिल्डर निराजन खड्काले जारी साफलाई बिर्सन नसकिने बताएका छन् । निराजनले सन् २०१३ पछि साफ सुजुकी कपबाट राष्ट्रिय टिममा पूनरागमन गर्न सफल हुन् ।

तस्बिर : विवेक सुवेदी / हाम्रो खेलकुद

‘एउटा खेलाडीको लागि लामो समयपछि राष्ट्रिय टिममा पुनरागमन गरेर गोल गर्नु जतिको खुशी अरु हुन सक्दैन । म एकदमै खुशी छु । म भन्दा पनि मेरो टिमलाई प्राथमिकतामा राखेको छु, ’ मिडफिल्डर निराजनले भने, ‘साफ सुजुकी कप जितेर सम्पूर्ण नेपालीलाई खुसी दिने चाहना छ । टिमले त्यही अनुसारको मिहेनत गरिरहेका छौं । खेलाडीले शतप्रतिशत खेलेका छन् । उपाधि जित्न सकने क्षमता टिममा छ ।’

उनले साफमा सहभागी सबै टोली राम्रो रहेको बताउदै माल्दिभ्सविरुद्धको सेमिफाइनलमा विपक्षीको कमजोरीको फाइदा उठाउने र आफ्नो बलियो पक्षलाई कायम राखिराख्ने बताए । निराजनले २००८ मा पोखरामा भएको पाकिस्तानविरुद्धको मैत्रीपूर्ण खेलबाट डेब्यु गरेका थिए । झन्डै पाँच वर्ष राष्ट्रिय टिममा विताएका उनी फेरि त्यसपछि पाँच वर्ष नै राष्ट्रिय टिममा पर्न सकेका थिएनन् । उनले यसैपटक साफबाट राष्ट्रिय टोलीमा पुनरागमन गरेका हुन् ।

तस्बिर : विवेक सुवेदी / हाम्रो खेलकुद

बंगलादेशमा जारी साफ सुजुकी कपमा तीन खेल खेलिसकेको निराजनले भुटानविरुद्धको खेलमा राष्ट्रिय टोलीका लागि पहिलो गोल गरेका थिए । उनले हालसम्म राष्ट्रिय टोलीका लागि ३१ क्याप जितेका छन् ।