प्रकाश तिमल्सिना

ढाका – नेपाली फुटबल टोलीको यसपटकको साफ सुजुकी कप (साफ च्याम्पियनसिप) को सेमिफाइनल यात्रा जति चुनौतीपूर्ण रह्यो त्यत्तिनै सफल पनि । विगतमा गोलको खडरी तोड्न नसक्ने आरोप खेप्दै आएको नेपाली टोलीले २५ वर्षे इतिहास बोकेको साफको समूह चरणमा अहिले सम्मकै सर्वाधिक गोल गर्न सफल भएको छ ।

तस्बिर : विवेक सुवेदी / हाम्रो खेलकुद

यसअघि समूह चरणमा अपराजित रहेको इतिहास बनाइसकेको नेपालले यसपटक त्यो सफलतालाई निरन्तरता दिन सकेन । तर, टोलीले समूह चरणमा अहिले सम्मकै सर्वाधिक गोल भने गर्न सफल भएको छ । समूह चरणका ३ खेलमा नेपालले ७ गोल गरेको छ । विसं २०७३ को कार्तिकमा एएफसी सोलिडारिटी कप जित्दा उच्च प्रदर्शन गरेको नेपाल टोलीले त्यसपछि एसियन छनोटमा भने सन्तोषजनक प्रदर्शन गर्न सकेन ।

झन्डै एक वर्षकाबीचमा खेलका ६ खेलमा नेपालले जम्मा ३ गोल मात्र गर्न सकेको थियो । तर, यसपटक कथा बदलिएको छ । पाकिस्तानसँग पहिलो खेलमा २–१ ले पराजित हुँदै निराशाजनक सुरुवात गरेको नेपालले पछिल्ला दुई खेलमा स्तरीय प्रदर्शन गरेको थियो । भुटानलाई ४–० ले हराएपछि नेपाली टोलीको मनोबल उच्च देखिएको नेपालले जित बाहेकको विकल्प नरहेको बंगलादेशसँगको खेलमा २–० को जित निकालेको थियो ।

तस्बिर : विवेक सुवेदी / हाम्रो खेलकुद

सन् १९९३ बाट दक्षिण एसियाली फुटबल महासंघ (साफ) को आयोजना भएको पहिलो सार्क गोल्डकप यता नेपालले समूह चरणमा सबै भन्दा बढी गोल गरेको यसै पाली हो । त्यति मात्र होइन समूह चरणमा १ गोल मात्र खाएको पनि यो पहिलो पटक हो । पाकिस्तानसँग पहिलो खेल २–१ ले हारेपछि नेपाली फुटबल टोलीले चर्को आलोचना खप्नु परेको थियो ।

कतिले त नेपालले भुटानलाई पनि जित्न नसक्ने आकलन समेत गरेका थिए । प्रशिक्षक बालगोपाल महर्जनले नियमित कप्तान विराज महर्जनसहित पहिलो खेलमा प्रभाव जमाउन नसकेका भरत खवास र नवयुग श्रेष्ठलाई पनि भुटान विरुद्ध पहिलो रोजाइमा राखेनन् । त्यसले रंग पनि ल्यायो । ४ अलग अलग खेलाडीले गोल गरे । भुटान र बंगलादेशमाथि नेपाली टोली पूर्ण रुपमा हावी रह्यो । गोलका लागि तड्पिने नेपाली टोलीका लागि समूह चरणमा ६ खेलाडीले गोल गरिसकेका छन् ।

विमल घर्तिमगरले २ गोल गर्दा अनन्त तामाङ, सुनील बल, भरत खवास, नीराजन खड्का र नवयुग श्रेष्ठले पनि गोल गेका छन् । सुनील, नीराजनले पहिलो पटक राष्ट्रिय टोलीका लागि गोल गरेका हुन् । नेपालले समूह चरणका सबै खेलमा गोल गरेको यो चौथो पटक हो । यसअघि १९९९, २०११ र २०१३ मा नेपालले सबै खेलमा गोल गरेको थियो । यसपटक समूह चरणमा सबैभन्दा बढी गोल गर्नेमा पनि नेपाली टोली नै रहेको छ ।

तस्बिर : विवेक सुवेदी / हाम्रो खेलकुद

नेपालले ३ खेलमा ७ गोल, पाकिस्तानले ५ र भारतले २ खेलमा ४ गोल गरेको छ । समूह चरणमा एक गोल पनि नगरी सेमिफाइनल पुगेको माल्दिभ्सलाई बुधबारको सेमिफाइनलमा हराउन सके नेपालले साफ च्याम्पियनसिपमा पहिलो पटक फाइनल पुग्ने इतिहास रच्ने छ ।

नेपालको साफ इतिहास :

नेपालले बंगलादेशमा जारी साफ सुजुकी कपको समूह चरणमा सवैभन्दा धेरै गोल गर्न सफल भएको छ । नेपालले समूह चरणका तीन खेलमा ७ गोल गर्दै दुई गोल मात्रै बेहोर्यो ।

सन् २०१५ को साफमा नेपालले समूह चरणहको दुई खेलमा १ गोल गर्दा ५ गोल खाएको थियो ।

नेपालमा २०१३ मा भएको साफको समूह चरणको तीन खेलमा ५ गोल गर्दै ३ गोल बेहोर्यो ।

फाइल तस्बिर २०१३ साफ

२०११ मा समूह चरणको तीन खेलमा नेपालले समान तीन गोल गर्दा तीन गोल नै बेहोर्यो ।

यस्तै २००९ मा समूह चरणको तीन खेलमा नेपालले ४ गोल गर्दा २ गोल खाएको थियो ।

सन् २००८ मा समूह चरणको तीन खेलमा नेपालले ५ गोल गर्दा ९ गोल खाएको थियो ।

सन् २००५ मा समूह चरणको तीन खेलमा ४ गोल गर्दा ५ गोल खाएको थियो ।

सन् २००३ मा समूह चरणको तीन खेलबाट नेपालले ४ गोल गर्दा समान ४ गोल नै खाएको थियो ।

सन् १९९९ मा दुई खेलबाट नेपालले ५ गोल गर्दा ५ गोल नै बेहोरेको थियो ।

सन् १९९७ मा समूह चरणका दुई खेलबाट नेपालले १ गोल गर्दा ५ गोल खाएको थियो ।

सन् १९९५ मा समूह चरणको दुई खेलमा नेपालले दुई गोल गर्दा दुई गोल नै खाएको थियो ।

सन् १९९३ मा नेपालले समूह चरणको तीन खेलबाट १ गोल गर्दा २ गोल खाएको थियो ।