मैत्रीपूर्ण खेलमा जर्मनी विजयी

म्युनिख (एजेन्सी) – अन्तर्राष्ट्रिय मैत्रीपूर्ण खेलमा जर्मनी विजयी भएको छ । जर्मनीले पेरुमाथि २–१ को कठिन जित निकालेको हो ।

सिनसेममा भएको प्रतिस्पर्धात्मक खेलमा घरेलु टोली जर्मनीले खेलमा पछि परेको स्थिति उल्ट्याएर जित हात पारेको हो । जर्मनीको कठिन जितमा जुलियन ब्रान्ट र निको स्कुल्जले गोल गरे । पेरुका लागि लुइस एडभिन कुलाले गोल गरे ।

विसरोल रेइन निकार एरिनामा आइतबार राति भएको खेलमा जर्मनी २२औं मिनेटमा पछि परेको थियो । पेरुका लुइस इडभिन कुलाले गोल गर्दै घरेलु टोलीमाथि दवाव बढाएको थियो । तर, पेरुको त्यो अग्रता तीन मिनेट पनि टिकेन । २५औं मिनेटमा जुलियन ब्रान्टले टोनी क्रुसको पासलाई सदुपयोग गरेपछि खेल १–१ गोलको बराबरीमा पुगेको थियो ।

खेल सकिन ५ मिनेट बाँकी रहँदा निको स्कुल्जले निर्णायक गोल गरेपछि जर्मनीले पेरुमाथि २–१ को कठिन जित निकाल्न सफल भयो ।