आर्हुस (एजेन्सी) – स्पर्स मिडफिल्डर क्रिस्टियन एरिक्सनले म्यान अफ द म्याच प्रदर्शन गरेपछि यूईएफए नेसन्स लिगअन्तर्गत आइतबर डेनमार्कले वेल्सलाई २-० ले पराजित गरेको छ ।

पछिल्लो खेलमा डेनमार्कका सिनियर खेलाडीले फुटबल संघविरुद्ध आन्दोलन गर्दै राष्ट्रिय टोली छाड्ने चेतावनी दिएर नखेलेपनि यस खेलमा भने डेनमार्कले माग पूरा गर्दै बलियो टोली उतारेको थियो । खेलको पहिलो हाफमा एरिक्सनले डेनमार्कलाई अग्रता दिलाएका थिए । दोस्रो हाफमा उनले पेनाल्टीमार्फत गोल गर्दै अग्रता दोब्बर पारे ।

निकै प्रतिस्पर्धात्मक खेलमा वेल्सले पनि पाएको मौका सदुपयोग गर्न नसक्दा हारको सामना गर्नुपर्यो । प्रशिक्षक रायन गिग्सले अघिल्लो खेलमा आयरल्यान्डलाई ४-१ ले पराजित गर्दै सुखद सुरुआतलाई निरन्तरता गरेपनि नेसन्स लिगमा भने खराब सुरुआत पाए । डेनमार्कले मिडफिल्डमा एरिक्सनको साथसँगै खेलमा पकड जमाएको थियो । वेल्सका कप्तान ग्यारेथ बेलले पछिल्लो खेलमा २ गोल गरेपनि डेनमार्क विरुद्ध भने गोल गर्न सकेनन् ।

गिग्सले प्रशिक्षकमा नियुक्त भएयता ५ खेलमा २ हार बेहोरेका छन् । उनले टोली सम्हाल्नुअघि वेल्सले अघिल्ला १२ खेलमा २ हारको सामना गरेको थियो । यससँगै डेनमार्कले घरेलु मैदानमा आफ्नो राम्रो रेकर्ड कायम राखेको छ । पछिल्लोपटक सन् २०१६ मा पराजित भएयता ११ खेलमा डेनमार्क अपराजित छ ।