ढाका (हाम्रो खेलकुद) – साफ च्याम्पियनसिपअन्तर्गत समूह चरणको अन्तिम खेलमा आइतबार भारतले माल्दिभ्सलाई २-० ले पराजित गर्यो । समूह ‘बी’ को अन्तिम नतिजासँगै भारत २ खेलमा ६ अंक बटुल्दै समूह विजेता बन्यो ।

त्यसै समूहमा यसअघि भारतले पहिलो खेलमा श्रीलंकालाई समान २-० गोल अन्तरले नै पराजित गरेको थियो । शुक्रबार श्रीलंका र माल्दिभ्सको खेल गोलरहित बराबरीमा टुंगिएको थियो । आइतबारको नतिजासँगै समूह उपविजेताको टुङ्गो लगाउन प्रतियोगिताको नियमअनुसार टस गर्नुपर्ने भयो । कारण श्रीलंका र माल्दिभ्स दुवैको १-१ अंक थियो र गोलअन्तर पनि समान । प्रतियोगिताको नियमावलीमा अनुशासन अंक नभएर गोलाप्रथा लेखिएका कारण उपविजेताको छिनोफानो टस मार्फत गरिएको थियो ।

माल्दिभ्सले समूह चरणका दुई खेलमा १ बराबरी र १ हार बेहोरेको थियो । दुवै खेलमा माल्दिभ्स गोल गर्न असफल रहयो । साफ च्याम्पियनसिपको इतिहासमै कुनै गोल नगरी टोली अर्को चरणमा पुगेको यो नै पहिलो पटक हो । अब माल्दिभ्सले बुधबार हुने सेमिफाइनल खेलमा नेपालको सामना गर्नेछ । यो खेल नेपाली समय अनुसार दिउँसो ३:४५ बजे हुनेछ । अर्को सेमिफाइनलमा भारत र पाकिस्तान खेल्नेछन् ।

नेपाल हालसम्म ४ पटक साफ च्याम्पियनसिपको सेमिफाइनल पुगेको छ । नेपालले अहिलेसम्म फाइनल यात्रा भने तय गरेको छैन । बालगोपाल महर्जनको प्रशिक्षकत्वमा रहेको नेपाली टोली यसै सफलता हात पार्ने सुरमा छ । उपाधि जित्ने लक्ष्य लिएर बंगलादेश प्रस्थान गरेको टोलीसामु अब २ जितको चुनौती अगाडी छ ।