एजेन्सी – लिभरपुल तथा इजिप्टका स्टार खेलाडी मोहमद सलाहले अफ्रिका कप अफ नेसन्सको छनोट चरणअन्तर्गत शनिबार नाइजरविरुद्धको खेलमा रोमाञ्चक प्रदर्शन गरेका छन् । उनले खेलमा दुई गोल र दुई असिस्ट मात्र दिएनन्, दुई पटक पेनाल्टीमा गोल गर्न पनि चुके ।

सलाहकै प्रदर्शनमा इजिप्टले नाइजरमाथि ६–० ले जित दर्ता गर्यो । सलाहले खेलको पहिलो मिनेटमा पहिलो पेनाल्टी पाएका थिए । तर, उनको त्यो पेनाल्टी नाइजरका गोलरक्षकले उत्कृष्ट बचाउ गरे । इजिप्टले खेलको १३ औं मिनेटमा मारवान मोहसेनको गोल मार्फत अग्रता लिएको थियो । सात मिनेट पछि सलाहको पासमा अब्दल अशरफको गोलमा अग्रता दोब्बर भयो । २९ औं मिनेटमा सलाह स्वयंले गोल गरे ।

सलाहले ३० मिनेट समय बितेपछि पुन: पेनाल्टीको मौका पाए । तर, फेरिपनि पेनाल्टीलाई गोलमा परिणत गर्नबाट चुके । उनको दोस्रो पेनाल्टी पनि नाइजरका गोलरक्षकले बचाए । यतिबेला सम्म इजिप्टले ३–० को अग्रता बनाइसकेको थियो । इजिप्टको चौथो गोलका लागि सलाहले खेलको ७३ औं मिनेटमा सलाह मोहसेनलाई असिस्ट गरेका थिए । यो मोहमद सलाहको उक्त खेलमा दोस्रो असिस्ट थियो ।

त्यसपछि खेलको ८६ औं मिनेटमा सलाहले व्यक्तिगत दोस्रो गोल गर्दै इजिप्टलाई ५–० को फराकिलो अग्रता दिलाए । खेलको इन्ज्युरी समयमा मोहमद एल्नेनीलले गोल गर्दै नाइजरविरुद्ध ६–० को फराकिलो जित निकाले । यस जितसँगै इजिप्टको राष्ट्रिय टोलीका नवनियुक्त प्रशिक्षक मारियो अगुइरेले सानदार सुरुआत गरेका छन् ।