प्रकाश तिमल्सिना
ढाका – नेपाली टोलीका फरवार्ड विमल घर्तिमगरले साफ च्याम्पियनसिपको सेमिफाइनलमा भारत भन्दा माल्दिभ्ससँग खेल्ने चाहना राखेका छन् ।

जित्नै पर्ने बंगलादेशविरुद्धको समूह चरणको खेलमा नेपाली टोली २–० ले जितेपछि विमलले भने, ‘म व्यक्तिगत रुपमा सेमिफाइनलमा माल्दिभ्स आओस् भन्ने चाहन्छु । फाइनलमा भारतलाई हराउने चाहना छ । मलाइ मात्र होइन हरेक समर्थक भारतलाई हराएको हेर्न चाहन्छन् ।’

उनले लामो समय गोल नहुँदा व्यक्तिगत दबाब हुने भएको स्वीकार्दै टोली जित्नु महत्वपूर्ण हुने बताएका छन् । ‘टिमले राम्रो गरेको छ । बलियो भएको छ । सबैले एकअर्कालाई साथ दिएका छौं । समर्थकले पनि हामीलार्ई साथ देखिएका छन्’ , उनले भने, ‘टिमवर्कका लागि खेल्ने हो । जसले गोल गरेपछि टिम जित्नुपर्दछ । मेरो खेलमा पनि सुधार भएको छ ।’

नेपालका लागि सर्वाधिक गोल गर्ने कीर्तिमानीमा विमलले आफ्नो ध्यान नदिएको बताएका छन् । ‘ व्यक्तिगत उपलब्धीमा मैले खासै वास्ता गर्ने गरेको छैन । टिम जित्नुपर्छ । मेरो लागि त्यो भए पुग्छ, ‘ बंगलादेशविरुद्ध पहिलो गोल गरेका विमल घर्तिमगरले भने, ‘टोलीका सबै खेलाडी र समर्थकले यसपटक च्याम्पियन बनेर फर्कन्छौं भन्नेमा आशावादी छौं । हामी त्यसलाई लक्ष्य बनाएर अघि बढिरहेका छौं । ‘

सेमिफाइनल पुग्न जितबाहेकको विकल्प नरहेको शनिबारको खेलमा नेपालले बंगलादेशलाई २–० ले हराएको थियो । अर्को गोल नवयुग श्रेष्ठले गरेका थिए । पहिलो खेलमा पाकिस्तानले भुटानलाई ३–० ले हराएपछि नेपाल थप दबाबमा परेको थियो । त्यहि दबाबबाट टोलीलाई बाहिर निकाल्ने क्रममा विमलले झन्डै ३५ यार्डबाट फ्रिकिक गोल गर्दै नेपालको अघिल्लो चरणको आशा जगाएका थिए । सुनिल बललाई फाउल गरेपछि प्राप्त फ्रिकिकमा विमलले गोल गरेका थिए । उनको प्रहार रोक्न बंगलादेशका गोलकिपर असफल रहे । हातमा आइसकेको बल उनले फुत्काएपछि टाउको बल नाघेर गोलमा परिणत भएको थियो ।

विमलले आफू बिस्तारै खेलमा फर्कनेमा सन्तुष्टी पनि व्यक्त गरे । ‘आफ्नो गोल ननिस्कदा दबाब त हुन्छ’, उनले भने, ‘तर आफुले गोल गर्न नसक्दा पनि टोलीलाई जित दिलाउने हाम्रो प्रयास हुन्छ । अहिले पुरै टोली प्रतिबद्ध छ ।’ समूह चरणको पहिलो खेलमा विमलले गोल गरेपनि नेपाल पाकिस्तानसँग २–१ ले पराजित भएका थियो ।

नेपाली टोलीका लागि विमलको गोल संख्या आठ पुगेको छ । अहिले टोलीमा रहेका मध्ये भरत खवासको १० गोल पुगेको छ । भुटानविरुद्धको जितमा भरतले १ गोल गरेका थिए । नेपालका लागि सर्वाधिक गोल गर्नेमा हरि खड्का र नीराजन रायमाझी छन् । उनीहरुको नाममा १३ गोल छ ।