प्रकाश तिमल्सिना

ढाका- बंगालदेशमा जारी साफ च्याम्पियनसिप २०१८ को समूह ‘ए’ बाट नेपाल समूह विजेताको रुपमा सेमिफाइनलमा प्रवेश गरेको छ । समूहको अन्तिम खेलमा बंगलादेशलाई २-० ले पराजित गर्दै नेपाल समूह विजेता बन्न सफल भएको हो ।

समूहमा रहेक तीन टोलीको ६ अंक रहेपछि हेड टु हेड लिग टेबलको आधारमा समूह विजेता र उपविजेता छिनोफानो भएको हो । नेपाल ६ अंकसहित समूह विजेताको रुपमा सेमिफाइनल प्रवेश गरेको हो । पाकिस्तान र बंगलादेशको पनि समान ६-६ अंक भएपनि पाकिस्तान उपविजेता बन्दै सेमिफाइनल पुग्यो । नेपाल, बंगलादेश र पाकिस्तानको समान ६ अंक भएपछि तीन टोलीबीचको नतिजा हेरिएको थियो ।

तीन टोलीको खेलमा गोलअन्तरका आधारमा नेपाल अगाडी भएपछि समूह विजेता बन्दै नेपाल अगाडी बढेको हो । तीन टोलीको खेलमा सबै टोलीले १-१ जित दर्ता गरे । यसक्रममा नेपालले ३ गोल गर्दै २ गोल खाएको थियो भने समूह उपविजेता बनेको पाकिस्तानले २ गोल गर्दै २ गोल नै खायो । समूह चरणमा यात्रा टुंगिएको बंगलादेशले भने १ गोल गर्दै २ गोल खाएको थियो । भुटान भने कुनै अंक नजोडी समूहको पुछारमा रहेर घर फर्कियो ।

नेपालले समूहको अन्तिम खेलमा बंगलादेशलाई २-० ले पराजित गर्दा नेपालको लागि विमल घर्तिमगर र नवयुग श्रेष्ठले गोल गरे । जितको विकल्प नभएको अवस्थामा नेपालले निकै राम्रो प्रदर्शन गर्दै घरेलु टोलीलाई जितको कुनै मौका दिएन । नेपालले दुवै हाफमा १-१ गोल गर्दै पुरै समय खेल आफ्नो पकडमा राखेको थियो । नेपालले अब सेमिफाइनलमा समूह ‘बी’ को उपविजेताको सामना गर्नेछ ।