प्रकाश तिमल्सिना
ढाका– साफ सुजुकी कप (साफ च्याम्पियनसिप) अन्तगर्त बंगलादेशविरुद्धको अन्तिम खेलमा भरत खवासले नेपाली टोलीको कप्तानी गर्ने भएका छन् । यसअघि भुटानसँगको खेलमा गोलकिपर किरण चेम्जोङले कप्तानी गरेका थिए ।

त्यो खेलमा नियमित कप्तान विराज महर्जन र भरत पहिलो रोजाइमा नपरेपछि किरणले कप्तानीको मौका पाएका थिए । भरत र मिडफिल्डर नीराजन खड्काले बंगलादेशविरुद्धको खेलमा पहिलो रोजाईमा परेका छन् । ढाकास्थित बंगबन्धु नेसनल स्टेडियममा जारी साफ सुजुकी कपमा भरतले दोस्रो र नीराजनले पहिलो पटक पहिलो रोजाइमा खेल्ने अवसर पाएका हुन् ।

भुटानविरुद्धको खेलमा पहिलो राजाईमा रहेका अन्जन विष्ट र विशाल राईको ठाँउमा प्रशिक्षक बालगोपाल महर्जनले भरत र नीराजनलाई मौका दिएका छन् । पाकिस्तानविरुद्ध पहिलो रोजाईमा परेका भारतले त्यो खेलमा खासै प्रभाव पार्न सकेका थिएन ।

यपद्दी भुटानलाई दोस्रो खेलमा ४–० ले हराउँदै परिवर्तित खेलाडीका रुपमा प्रवेश गर्दै भरतले गोल समेत गरेका थिए । त्यो उनको राष्ट्रिय टोलीका लागि १० औं गोल थियो । भरत, नीराजन र नियमित कप्तान विराज तीनै जनाले सन् २००८ मा पोखरामा पाकिस्तानविरुद्धको खेलबाट राष्ट्रिय टोलीमा डेब्यू गरेका थिए । भरतको यो नेपालका लागि ४५ औं अन्तर्राष्ट्रिय खेल हो ।

नेपाली टोली
गोलकिपर– किरण चेम्जोङ
रक्षक –आदित्य चौधरी, दीनेश राजवंशी, सुमन अर्याल, अनन्त तामाङ
मिडफिल्ड- रोहित चन्द, नीराजन खड्का, सुनिल बल, सुजल श्रेष्ठ
फरवार्ड – विमल घर्तिगमर,भरत खवास (कप्तान)