प्रकाश तिमल्सिना
ढाका– फरवार्ड भरत खवास र मिडफिल्डर नीराजन खड्का साफ सुजुकी कप (साफ च्याम्पियनसिप) अन्तर्गत बंगलादेशविरुद्धको शनिबार हुने समूह चरणको अन्तिम खेलमा पहिलो रोजाईमा परेका छन् । ढाकास्थित बंगबन्धु नेसनल स्टेडियममा जारी साफ सुजुकी कपमा भरतले दोस्रो र नीराजनले पहिलो पटक पहिलो रोजाइमा खेल्ने अवसर पाएका हुन् ।

नेपाली टोलीका सदस्य नीराजन खड्का (बायाँ) र भरत खवास ।

पाकिस्तान र भुटानविरुद्धको दुवै खेलमा नीरानजले परिवर्तित खेलाडीका रुपमा प्रभावशाली प्रदर्शन गरेका थिए । भुटानविरुद्धको खेलमा पहिलो राजाईमा रहेका अन्जन विष्ट र विशाल राईको ठाँउमा भरत र नीराजनलाई राखिएको हो । पाकिस्तानविरुद्ध पहिलो रोजाईमा परेका भारतले त्यो खेलमा खासै प्रभाव पार्न सकेका थिएन ।

यपद्दी भुटानलाई ४–० को जितको खेलमा परिवर्तित खेलाडीका रुपमा प्रवेश गर्दै भरतले गोल समेत गरेका थिए । त्यो उनको राष्ट्रिय टोलीका लागि १० औं गोल थियो । त्यो खेलमा नीराजनले पनि गोल गरेका थिए । त्यो उनको पहिलो अन्तर्राष्ट्रिय गोल हो । भरत र नीराजन दुवैले सन् २००८ मा पोखरामा पाकिस्तानविरुद्धको खेलबाट राष्ट्रिय टोलीमा डेब्यू गरेका थिए ।

आज खेलमा सुरुवात गरेसँगै भरतले ४५ र नीराजनले ३१ क्याप जित्नेछन् । सन् २०१३ पछि नीराजनले पहिलो पटक राष्ट्रिय टोली पुनरागमन गरका हुन् । प्रशिक्षक बाल गोपाल महर्जनले भुटानविरुद्ध विमल घर्तिमगरलाई अग्रपक्तिको मोर्चा सम्हाल्ने जिम्मा दिएका थिए भने आजको खेलमा उनलाई भरतको साथ रहनेछ । किरण चेम्जोङले लगातार दोस्रो पटक राष्ट्रिय टोलीको कप्तानी गर्नेछन् ।

अनन्त तामाङ, आदित्य चौधरी सहित सुमन आर्याल र दीनेश राजवंशीले रक्षापक्ति सम्हाल्नेछन् । नीराजनसहित मिडफिल्डमा रोहित चन्द, सुनिल बल र नीराजन रहनेछन् । नेपाल र बंगलादेशको खेल नेपाली समय अनुसार साँझ६ः४५ बजे सुरु हुनेछ । बंगलादेश दुवै खेल जित्दै ६ अंकका साथ शीर्षस्थानमा छ । त्यसअघि केहि समयमा सोही समूहमा पाकिस्तान र भुटानबीचको प्रतिस्पर्धा हुनेछ । नेपाल र पाकिस्तानको समान ३ अंक छ भने भुटान अंक विहिन छ । दुई खेलको नतिजापछि समूहबाट सेमिफाइनल पुग्ने दुई टोलीको टुंगो लाग्नेछ ।

नेपाली टोली
गोलकिपर– किरण चेम्जोङ (कप्तान)
रक्षक –आदित्य चौधरी, दीनेश राजवंशी, सुमन अर्याल, अनन्त तामाङ
मिडफिल्ड- रोहित चन्द, नीराजन खड्का, सुनिल बल, सुजल श्रेष्ठ
फरवार्ड – विमल घर्तिगमर,भरत खवास