प्रकाश तिमल्सिना
ढाका-साफ सुजुकी कप (साफ च्याम्पियनसिप) अन्तर्गत बंगलादेशविरुद्धको समूह चरणको अन्तिम खेलमा प्रशिक्षक बालगोपाल महर्जनले अघिल्लो खेलको पहिलो रोजाईमा दुई खेलाडी परिवर्तन गर्ने भएका छन् । लगातार दोस्रो खेलमा गोलकिपर किरण चेम्जोङले कप्तानी गर्ने भएका छन् ।

अघिल्लो खेलमा पहिलो रोजाईमा रहेका अन्जन विष्टको ठाँउमा भरत खवास तथा विशाल राईको ठाँउमा नीराजन खड्कालाई खेलाउने तयारी भइरहेको बुझिएको छ । भरत पाकिस्तानविरुद्धको पहिलो खेलमा पहिलो रोजाईमा थिए भने नीराजन पहिलो र भुटानविरुद्ध दुवै खेलमा परिवर्तित खेलाडी रुपमा प्रवेश गरेका थिए । भरत र नीराजन दुवैले भुटानविरुद्ध गोल गरेका थिए ।

पहिलो खेलमा पाकिस्तानसँग २–१ ले पराजित भएपछि भुटानविरुद्धको खेलमा महर्जनले कप्तान विराज महर्जनसहित फरवार्डद्वय भरत खवास र नवयुग श्रेष्ठलाई आराम दिएका दिए । उनीहरुको ठाँउमा दीनेश राजवंशी, सुनिल बल र विशाल राईलाई पहिलो रोजाइमा राखेका थिए ।

पहिलो पटक पहिलो रोजाइमा पर्दा सुनिलले उच्च प्रदर्शन गर्ने क्रममा ४ मध्ये ३ गोलमा भूमिका निर्वाह गरे । टोलीका लागि दोस्रो गोल गरेका उनले अनन्त तामाङ र नीराजन खड्काको हेड गोलमा कर्नर प्रहार गरेका थिए । अर्को गोल भरत खवासले गरेका थिए ।

 नेपाल र बंगलादेशको खेल नेपाली समय अनुसार साँझ६ः४५ बजे सुरु हुनेछ । त्यसअघि पाकिस्तान र भुटानबीचको प्रतिस्पर्धा हुनेछ । त्यो नतिजाले पनि नेपालको अघिल्लो चरणाको यात्रामा प्रभाव पार्नेछ ।

नेपाली टोली
गोलकिपर– किरण चेम्जोङ (कप्तान)
रक्षक –आदित्य चौधरी, दीनेश राजवंशी, सुमन अर्याल, अनन्त तामाङ
मिडफिल्ड- रोहित चन्द, नीराजन खड्का, सुनिल बल, सुजल श्रेष्ठ
फरवार्ड – विमल घर्तिगमर,भरत खवास