ढाका (हाम्रो खेलकुद) – बंगलादेशमा जारी साफ सुजुकी कप अन्तर्गत नेपालले शनिबार समूह चरणको अन्तिम खेलमा घरेलु टोली बंगलादेशसँग खेल्दैछ । खेल बंगबन्धु स्टेडियममा नेपाली समयअनुसार साँझ ६ः४५ बजेपछि शुरु हुनेछ ।

तस्बिर : विवेक सुवेदी / हाम्रो खेलकुद

नेपाल र बंगलादेशले खेल्नुअघि भुटान र पाकिस्तानले सोही मैदानमा प्रतिस्पर्धा गर्दैछ । समूह ‘ए’ मा चारै टोलीको सेमिफाइनल प्रवेश गर्ने गणितीय सम्भावना बाँकी रहँदा पहिलो खेल सबै टोलीको लागि निकै महत्वपूर्ण छ ।

गोल अन्तरका आधारमा दुई टोलीले अन्तिम चारमा स्थान बनाउने हुदा पहिलो खेलले नै दुई टोलीको टुङ्गो लगाउनेछ । पहिलो खेलमा पाकिस्तानले भुटानमाथि जित हात पारे पाकिस्तानको अघि बढ्ने सम्भावना बलियो हुनेछ । भुटानसँग पाकिस्तान पराजित भएको खन्डमा नेपाल र बंगलादेशले बराबरी खेले दुवै टोलीले अन्तिम चारमा स्थान बनाउनेछन् । बंगलादेशमाथिको जितले नेपालले अन्तिम चारमा स्थान पक्का गर्नेछ ।

बंगलादेशमा पराजित भएको खन्डमा नेपालको यात्रा गोलअन्तरमा नै भर पर्नेछ । जारी प्रतियोगिताको प्रदर्शन हेर्ने हो भने घरेलु टोली बंगलादेशलाई पराजित गर्न नेपाललाई निकै गाह्रो हुनेछ । बंगलादेशले समूह चरणमा शतप्रतिशत जित निकालेकाले पनि बंगलादेशलाई पराजित गर्न त्यति सहज हुनेछैन । बंगलादेशको बलियो डिफेन्स, छरितो मिडफिल्ड र आक्रमक फरवार्डलाई रोक्न नेपाललाई मुस्किल हुनेछ । टोपु बरमान, विप्लो अहमद, मेहबुबुर रहमान लगायतका खेलाडीलाई रोक्न नेपालको लागि चुनौतिपूर्ण हुनेछ ।

तस्बिर : विवेक सुवेदी / हाम्रो खेलकुद

यता, नेपालले समूह चरणको पहिलो खेलमा राम्रो खेल्दा खेल्दैपनि पाकिस्तानसँग अन्तिम समयमा गोल खादै पारजित हुन पुगेको थियो । भुटानविरुद्धको दोस्रो खेलमा अघिल्लो खेलको कमजोरी सुधार गरेर खेल्दा नेपालले भुटानमाथि ४–० को सहज जित निकाल्न सफल भयो । नेपालले भुटानविरुद्धको खेलमा सबै पक्षमा चुस्त प्रर्दशन गरेको थियो । त्यही खेललाई निरन्तरता दिने सके नेपालले भुटानलाई पराजित गर्न सक्ने क्षमता राख्दछ ।

तस्बिर : विवेक सुवेदी / हाम्रो खेलकुद

नेपाली टिमका प्रशिक्षक किरण श्रेष्ठले घरेलु टोलीविरुद्धको खेल निकै महत्वपूर्ण रहेको बताए । ‘हामीलाई बंगलादेशविरुद्धको खेल निकै महतवपूर्ण छ । त्यो भन्दापनि भुटान र पाकिस्तानविरुद्धको खेल झनै महत्त्वको छ । पहिलो खेलको नतिजाका आधारमा हामी घरेलु टोलीविरुद्ध रणनीति बनाउनेछौं ‘, प्रशिक्षक श्रेष्ठले प्रि–म्याच पत्रकार सम्मेलनमा भने, ‘पहिलो खेलमा पाकिस्तान भुटानसँग पराजित भए नेपालले त्यही अनुसार खेल्नेछ । पाकिस्तान विजयी भएको खन्डमा हामी त्यही अनुसारको रणनीति बनाउनेछौं ।’

साफ च्याम्पियनसिपमा नेपाल–बंगलादेशको हेड टु हेड
२७ मार्च १९९५ नेपालविरुद्ध बंगलादेश ०–२ (सार्क गोल्डकप)

२९ अप्रिल १९९९ नेपालविरुद्ध बंगलादेश १–२

११ जनवरी २००३ नेपालविरुद्ध बंगलादेश ०–१

१० डिसेम्वर २००५ नेपालविरुद्ध बंगलादेश ०–२

४ डिसेम्वर २०११ नेपालविरुद्ध बंगलादेश १–०

३१ अगस्ट २०१३ नेपालविरुद्ध बंगलादेश २–०