न्यु जर्सी (एजेन्सी) – अन्तर्राष्ट्रिय मैत्रीपूर्ण खेलमा ब्राजिल विजयी भएको छ । ब्राजिलले अमेरिकामाथि २–० को सहज जित निकालेको हो ।

ब्राजिलको जितमा कप्तान नेयमार र फिर्मिनोले गोल गरे । दुवै गोल पहिलो हाफमा सम्भव भएको थियो । न्यु जर्सीमा शनिबार बिहान भएको खेलमा ब्राजिलले रोबर्टाे फिर्मिनोको गोलबाट अग्रता बनाएको थियो । फिर्मिनोले डुगलस कोस्टाको क्रस पासमा पोस्ट नजिकैबाट गोल गरेका थिए ।

घरेलु टोलीलाई दवावमा राखेपनि ब्राजिलले त्यसपछि गोल गर्न ४३औं मिनेट कुर्नुपरेको थियो । स्टेफनले पेनाल्टी बक्समा नेयमारलाई लडाएपछि ब्राजिलले पेनाल्टीको मौका पाएको थियो । जसमा नेयमार चुकेनन् ।

पहिलो हाफमा २–० को अग्रता बनाएको ब्राजिलले दोस्रो हाफमा गोल गर्ने प्रयास गरेपनि सफल हुन सकेन । यता घरेलु टोलीले गोलका केही मौकाहरु खेर फाल्दा २–० ले पराजित हुन पुग्यो ।

शनिबार बिहान नै भएको अर्काे मैत्रीपूर्ण खेलमा कोलम्वियाले भेनेजुएलामाथि २–१ को जित निकाल्यो । कोलम्वियाले खेलमा पछि परेको स्थिति उल्ट्याएर जित निकालेको हो । कोलम्वियाको जितमा राडामेल फल्काओ र यिम्मी चाराले गोल गरे । भेनेजुएलाका डार्विन माचिसले गोल गरे ।

बराबरीतर्फ धकेलिएको खेलको इन्जुरी समयमा यिम्मी चाराले गोल गर्दै कोलम्वियालाई २–१ को जित दिलाएका थिए ।