एजेन्सी – क्रिस्टियानो रोनाल्डो, लुका मोड्रीच र मोहम्मद सलाह को नाम समेटिएको फिफा उत्कृस्ट खेलाडीको मनोनयन केहि दिन अघि सार्वजनिक भयो । यो सुचिमा पर्नु पर्ने भएपनि छुटेका एक मात्र खेलाडी हुन् अर्जेन्टिनाका स्टार स्ट्राइकर लियोनल मेस्सी ।

सन् २००६ यता मेस्सी यो सुचिमा १२ बर्ष लगातार पर्दै आएका थिए । उत्कृष्ट क्लब सिजनका बाबजुद फिफाको अवार्डमा मेसीलाई यस सिजन शीर्ष तीन मनोनयनमा पर्न सकेनन् । सुचिमा परेका मध्ये लुका मोड्रीचका लागि पछिल्लो सिजन सानदार थियो । क्लब फुटबलमा रियल म्याड्रिडबाट च्याम्पियन्स लिग जितेका मोड्रीचले विश्वकपमा आफ्नो टोलि क्रोएसियालाई फाइनलसम्म पुर्याएका थिए । यस्तै रुस विश्वकपको गोल्डेन बलको भागीदार समेत मोड्रीच बने ।

यस्तै सूचिका अर्का खेलाडी रोनाल्डोले समेत गत सिजन रियल म्याड्रिडका लागि च्याम्पियन्स लिग जिताउन प्रतियोगिताकै सर्वाधिक १५ गोल गरेका थिए । विश्वकपमा भने उनले पोर्चुगललाई राउण्ड अफ १६ बाट माथी लान सकेनन् । पछिल्लो सिजनको प्रिमियर लिगमा उत्कृस्ट प्रदर्शन गर्दै ३२ गोल गरेका सलाहले च्याम्पियन्स लिगमा समेत ११ गोल गरेका थिए । उनकै प्रेरणामा इजिप्टले विश्वकपमा स्थान बनाएपनि समुह चरणबाट माथी उठ्न सकेको थिएन ।

अर्को पक्षमा लियोनल मेस्सीको प्रदर्शन अरुको तुलना कदापि कम थिएन । बार्सिलोनालाई ला लिगा जिताउने क्रममा मेस्सीले ३४ गोल गर्न भ्याए । अर्जेन्टिनालाई विश्वकपमा लैजान समेत मेस्सीको भूमिका अतुलनिय थियो । आफ्नो प्रदर्शनका बाबजुद अर्जेन्टिनाले राउण्ड अफ १६ भन्दा अगाडी स्थान बनाउन सकेन । च्याम्पियन्स लिगमा सोचे अनुरुप प्रदर्शन नगरेपनि मेस्सिले १० खेलमा ६ गोल गरेका थिए ।

प्रतियोगितामा गोलबाहेक मेसीको नाममा सलाहको तुलनामा सर्वाधिक एसिस्ट, सर्वाधिक मौका सिर्जना, सर्वाधिक फ्री किक गोल र सर्वाधिक ड्रीबल रहेको थियो । सफलतासँगै तथ्यांकमा पनि मेसी सलाहभन्दा अगाडी नै छन् । यसका बाबजुद पनि मेसीले शीर्ष तीनमा नाम लेखाउन असफल रहे ।