म्यानचेस्टर (एजेन्सी) – म्यानचेस्टर युनाईटेडका मिडफिल्डर पाउल पोग्बाले ओल्ड ट्राफर्डमा आफ्नो बारेमा सधैं चर्चा भईरहने बताएका छन् । २५ वर्षीय पोग्बाले पछिल्लो सिजन केहि खस्किएको प्रदर्शन गरेका थिए ।

मोउरिन्होसँग खटपटको हल्ला र खस्किएको प्रदर्शनका कारण उनी यस सिजन युभेन्ट्स र बार्सिलोनासँग नजिक भएको बताइएको थियो । यस सिजन उनले ओल्ड ट्राफर्ड छोड्न सक्ने धेरैले अनुमान गरेको थिए । तर, ट्रान्सफर विन्डोमा उनी युनाईटेडमा रहे । बुधबार पोग्बाले भने, ‘कस्लाई थाहा छ की आउने केहि महिनामा के हुनेछ भनेर ।’

विश्वकप विजेता फ्रान्सले बिहिबार जर्मनीसँग यूईएफए नेसन लिगको उद्घाटन खेलमा गोलरहित बराबरि खेल्यो । खेलपछि उनलाई ‘तपाई थाकि सक्नु भयो ?; भन्ने प्रश्नमा उनले यसरी जवाफ दिए, ‘म विश्वकपबाट फिर्ता आएको छु । यसैले जति संभव छ त्यती प्रदर्शन गर्ने कोशिश गर्दै छु ।’ उनको र जोसे मोउरिन्होको सम्बन्धबारे सोध्दा उनले भने, ‘हामी सँग शुद्ध प्रशिक्षक–खेलाडीको सम्बन्ध छ । यो नै सत्य हो ।’ उनले थपे, ‘एक कुराबाटै तपाईलाई आश्वस्त पार्न सक्छु । म सधै शत प्रतिशत दिन्छु ।’

युनाइटेडका युवा खेलाडी पोग्बा चार बर्ष युभेन्ट्समा बिताएपछि पाँच बर्षको सम्झौतामा उनी ओल्ड ट्राफर्ड आएका थिए । सन् २०१६ मा उनी ८९ मिलियन पाउण्डको विश्व कीर्तिमानी मूल्यमा अनुबन्ध भएका थिए । उनलाई यस सिजनको प्रिमियर लिगको सुरुआती दुई खेलमा एन्टोनियो भ्यालेन्सियाको अनुपस्थितिमा मोउरिन्होले कप्तानको जिम्मेवारी पनि दिएका थिए ।