आम्स्टरड्याम (एजेन्सी) – डच मिडफिल्डर वेस्ली स्नाइडरले बिहिबार अन्तर्राष्ट्रिय फुटबलबाट सन्न्यास लिएका छन् । नेदरल्यान्ड्सले गएराती पेरुविरुद्ध २-० जितमा हात पर्दा अन्तिम पटक राष्ट्रिय टोलीको जर्सी पहिरिएका उनले टोलीको कप्तानी गरेका थिए ।

सन् २००३ मा पोर्चुगलविरुद्ध मैत्रीपूर्ण खेलमा राष्ट्रिय टोलीका लागि डेब्यु गरेका उनले १५ वर्षका दौरान १ सय ३३ खेलमा सहभागिता जनाए । २४ वर्षीय मिडफिल्डरले हाल कतारको अल घरफाबाट व्यावसायिक फुटबल खेल्ने गरेका छन् । उनले १८ वर्षको उमेर हुँदा नै राष्ट्रिय टोलीबाट खेलेका थिए । आयाक्सको सिनियर टोलीबाट दुई महिना खेल्दा अनि उनको स्तर देखेर प्रशिक्षक प्रभावित भएका थिए ।

उनले राष्ट्रिय टोलीबाट सन् २०१० को विश्वकपमा शानदार प्रदर्शन गर्दै टोलीलाई फाइनलसम्म पुर्याएका थिए । उनले त्यस प्रतियोगितामा ५ गोल गर्दै संयुत सर्वाधिक गोलकर्ता पनि बने । इटालियन क्लब इन्टर मिलानमा रहेर उनले थुप्रै उपाधि पनि जिते । त्यसअघि उनले छोटो समय रियल म्याड्रिडबाट पनि खेलेका थिए । उनलाई रियलले सन् २००७ मा आयक्सबाट २७ मिलियन युरो खर्चेर भित्र्याएको थियो । म्याड्रिडमा दुई वर्ष मात्र टिकेका उनले सन् २००९-१० मा इन्टरबाट तेहेरो उपाधि जितेका थिए । इन्टर छाडेर उनले ५ वर्ष टर्कीको गालाटासरेबाट पनि खेले । त्यसपछि भने उनी कतारमा खेल्दै आएका छन् ।

राष्ट्रिय टोलीबाट सन्न्यास लिएपछि स्नाइडरले भावुक हुँदै आफूले सहि निर्णय लिएको बताए । ‘ अब मेरो यात्रा सकिएको छ । राष्ट्रिय टोलीको लागि म अन्तिम खेल खेल्दैछु । सबै राम्रो कुराको अन्त्य हुनपर्ने रहेछ,’ उनले भने । राष्ट्रिय टोलीका वर्तमान कप्तान भर्जिल भान डाइकले स्नाइडरको एक खेलाडी मात्र नभएर व्यक्तित्वको रुपमा पनि टोलीमा कमी खड्कने बताए ।

‘हाम्रो टोलीको मैदान भित्र होस् या ड्रेसिङ रुम, उनको उपस्थिति निकै महत्त्वपूर्ण रहने गर्छ । उनले जुनियर खेलाडीलाई हौसला बढाउने काम गर्थे,’ भान डाइकले भने, ‘ उनले राष्ट्रिय टोलीको लागि धेरै योगदान दिए । उनीसँग खेल्न पाउनु मेरो लागि सौभाग्य थियो ।’