कार्डिफ (एजेन्सी) – रियल म्याड्रिडका स्टार फरवार्ड ग्यारेथ बेलले क्लबको फर्मलाई राष्ट्रिय टोलीमा पनि जारी राखेपछि यूईएफए नेसन्स लिग अन्तर्गत बिहीबार भएको बी लिगको चौथो समूहमा वेल्सले आयरल्यान्डलाई ४-१ ले पराजित गरेको छ ।

घरेलु मैदान कार्डिफ सिटी रंगशालामा वेल्सले छैटौं मिनेटमा टम लरेन्सको गोलमा अग्रता लिएको थियो । पूर्व लिभरपुल मिडफिल्डर जो एलनको पासलाई सदुपयोग गर्दै उनले अग्रता दिलाएका थिए । १८ औं मिनेटमा बेलले वेल्सको अग्रता दोब्बर पारे । टोटेनहम हट्स्पर डिफेन्डर बेन डेभिसको पासमा उनले उत्कृष्ट गोल गरेका थिए । ला लिगामा राम्रो लयमा देखिएका बेलले राष्ट्रिय टोलीमा पनि नियमितता दिएका छन् । आरोन राम्सीले गोल गरेपछि पहिलो हाफमा वेल्स ३-० ले अगाडी रहयो ।

दोस्रो हाफको सुरुआतमै वेल्सले अग्रता बढायो । रायन गिग्सको प्रशिक्षणमा रहेको टोलीका लागि कनर रोबर्ट्सले चौथो गोल गरे । उनले बेलको पासमा गोल थपेका थिए । आयरल्यान्डका लागि सन विलियम्सले ६६ औं मिनेटमा सान्त्वना गोल फर्काए । वेल्स्का प्रशिक्षक गिग्सले केहि ठूला नामलाई वैकल्पिक खेलाडीको रुपमा राखेर पनि सहज जित दर्ता गरेका हुन् ।

यूईएफएको नयाँ प्रतियोगिताको रुपमा अगाडी आएको नेसन्स लिगको यस समूहमा वेल्ससँगै डेनमार्क र आयरल्यान्ड छन् । वेल्सले अब अर्को खेल डेनमार्कसँग खेल्नेछ ।