लिस्वन (एजेन्सी) – अन्तर्राष्ट्रिय मैत्रीपूर्ण खेल अन्तर्गत क्रोएसिया र पोर्चुगलको खेल बराबरीमा टुंगिएको छ । बिहीबार राती भएको खेलमा  घरेलु टोली पोर्चुगलले विश्व उपविजेता क्रोएसियालाई १–१ गोलको बराबरीमा रोकेको हो ।

लिस्वनमा बिहिबार राति भएको खेलमा पोर्चुगलले खेलमा पछि परेको स्थितिमा बराबरी गोल गर्न सफल भएको हो । क्रोएसियाका इभान पेरिसिकले गोल गरे । पोर्चुगलका पेपेले गोल फर्काए । दुवै गोल पहिलो हाफमा सम्भव भएको हो ।

पाहुना टोली क्रोएसियाले खेलको १८औं मिनेटमा अग्रता लिन सफल भएको थियो । इभान पेरिसिकले गोल गर्दै अग्रता दिलाएका थिए । तर, ३२औं मिनेटमा डिफेन्डर पेपेले हेडमार्फत गोल फर्काएपछि खेल १–१ को गोलको बराबरीमा पुगेको थियो । घरेलु टोलीले खेलमा दवाव सिर्जना गरेपनि त्यसपछि गोल गर्न नसक्दा खेल बराबरीमा सकियो ।

पोर्चुगलले आफ्नो स्टार तथा कप्तान क्रिस्टियानो रोनाल्डोलाई विश्राम दिएको थियो । क्रोएसियाले आफ्नो शीर्ष खेलाडीलाई मैदान उतारेको थियो ।

बिहिबार राति नै भएको अर्काे खेलमा अष्ट्रियाले स्वीडेनलाई २–० ले पराजित गर्यो । फिलिप हिलन्डरको आत्मघाती गोलबाट अग्रता बनाएको अष्ट्रियाले ६४औं मिनेटमा डेभिड अलवाले गोल गर्दै जित पक्का गरेका थिए ।