म्यानचेस्टर (एजेन्सी) – म्यानचेस्टर युनाइटेडका मिडफिल्डर पाउल पोग्बाले सिजनको अन्त्यमा अवसर आए बार्सिलोना नजाने खुलासा गरेका छन् । सिजन सुरु हुनुअघि ट्रान्सफर विन्डोका दौरान पोग्बाले बार्सिलोनाले चाहे मनैदेखि जान चाहेको चर्चा चलेको थियो ।

क्याटलान क्लब बार्सिलोना पनि २५ बर्षीय पोग्बालाई क्याम्प नोउमा अनुबन्ध गर्न आतुर रहेका बताइएको थियो । तर ट्रान्सफर विन्डोमा युनाइटेडसँग प्रारम्भिक चरणको कुराकानी मात्र गरेर छाडेपछि उनले अब बार्सिलोना नजाने घोषणा गरेका छन् । उनले अब भविष्यमा पनि म्यानचेस्टर छाडेर अन्यत्र जाने सम्भावना नरहेको संकेत दिएका छन् । ‘धेरै कुरा थियो । तर, म हाल युनाइटेडमा अनुबन्ध छु । मेरो भविष्य वर्तमानमा युनाइटेडमै छ । मसँग अझै लामो सम्झौता छ । तर, कसलाई थाहा छ की आउने केहि महिनामा के हुने छ,’ पोग्वाले भने ।

रुस विश्वकपमा फ्रान्सलाई उपाधि दिलाएका पोग्बा कम्तिमा जनवरीसम्म ओल्ड ट्राफर्डमै रहने छन् । उनले सिजन २०१८–१९ को सुरुवाती चार खेल खेल्दा उनले दुई गोल गरिसकेका छन् । पोग्बाको मुख्य प्रशिक्षक जोसे मोउरिन्होसँग राम्रो सम्बन्ध नरहेको चर्चा क्लबले नकार्दै आएको छ । विश्वकपपछि पोग्बा ढिला क्लबमा आएको कारण मोउरिन्हो खुसी थिएनन् । तर पछिल्लो समय दुवैबीच राम्रो सम्बन्ध रहेको छ । मोउरिन्होले पोग्बालाई क्लबको कार्यवाहक कप्तानको जिम्मेवारी पनि सुम्पिएका छन् ।

पूर्व युभेन्ट्स खेलाडी पोग्बालाई युभेन्ट्सले पनि पुनः अनुबन्ध गर्न चासो देखाएको छ । यस महिनाको सुरुआतमा युभेन्ट्सका केहि अधिकारीले पोग्बा २०१९ को शरुवातमा टुरीन फर्कने बताएका थिए । इटालियन लिगमा लगातार सफलता हात पारेका पोग्बा युनाइटेडसँगको सम्झौता सकिने बेला फर्कने सम्भावना प्रबल छ ।