म्युनिख (एजेन्सी) – युइएफए नेसन्स लिगमा आज राति जर्मनीले विश्वविजेता फ्रान्सको सामना गर्दैछ । युइएफए नेसन्स लिगको समूह ‘ए’ मा रहेको जर्मनीले पहिलो खेलमा फ्रान्सको सामना गर्न लागेको हो । खेल जर्मनीको घरेलु मैदान एलिनाज एरिनामा नेपाली समय अनुसार रातको १२ः३० बजेपछि शुरु हुनेछ ।

विश्वकपमा गरेको खराव प्रदर्शनलाई बिर्संदै जर्मनी यही खेलबाट पुनरागमन गर्ने योजनामा हुनेछ । जर्मनीले रसिया विश्वकपमा तीन मध्ये दुई खेलमा पराजित हुदै समूह चरणबाट बाहिरिएको थियो । समूह चरणको पहिलो खेलमा मेक्सिकोसँग १–० ले पराजित भएको जर्मनीले स्वीडेनमाथि २–१ को जित निकालेपनि दक्षिण कोरियासँग २–० ले पराजित हुदै समूह चरणबाटै बाहिरिएको थियो । त्यसैले जर्मनी आफ्नो कमजोर प्रदर्शनलाई सुधार्दै विशवविजेता फ्रान्सलाई पराजित गर्ने योजनामा मैदान उत्रनेछ ।

युवा खेलाडीले भरिएको जर्मनी फ्रान्सविरुद्ध सुखद शुरुवातको अपेक्षमा हुनेछ । गोलरक्षक म्यानुयल निउरले कप्तानको भुमिका निर्वाह गर्दा उनलाई जेरोमी बोटिङ, माट्स ह्यामेल्स, एन्टोनियो रुडिगर, जोसुवा किम्मिच, टोनी क्रुस, मार्काे रिउस, थोमस मुलर, इकेए गुन्डोगान, जुलियन ड्राक्सलर, लिरोए साने, टिमो वेर्नर र जुलियन ब्रान्ट जस्ता युवा खेलाडीले साथ दिनेछन् । तर, फ्रान्ससँगको इतिहास जर्मनीले पक्षमा छैन । पछिल्ला तीन भेटमा जर्मनीले फ्रान्सलाई पराजित गर्न सकेको छैन । दुई खेलमा हार बेहोर्दा एक खेल भने बराबरी गर्न सफल भएको छ ।

यता, फ्रान्स आफ्नो पुरानो इतिहासलाई कायम राख्ने योजनामा मैदान उत्रनेछ । विशवविजेता फ्रान्ससँग केलियन एमबाप्पे, एन्टोइन ग्रिजम्यानजस्ता खेलाडीहरुको साथ रहेको छ । नियमित कप्तान तथा गोलरक्षक ह्युगो लोरिस चोटका कारण यस खेलमा उपस्थित रहने छैनन्  । प्रशिक्षक डीडीएर डेस्च्याम्पले उनको स्थानमा युवा खेलाडीले पोस्ट सम्हाल्ने बताएका छन् ।