दीपेन्द्र पोखरेल

टेक्सास, अमेरिका – बंगलादेशमा जारी साफ च्याम्पियनसिपअन्तर्गत समूहको दोस्रो खेलमा नेपालले भुटानको सामना गर्दैछ । दुवै टोली आ-आफ्नो पहिलो खेलमा पराजित भएको हुनाले प्रतियोगिताको अर्को चरणमा पुग्ने सम्भावना कायम राख्न दुवै टोलीलाई जित आवश्यक छ ।

भुटानको फुटबल पछिल्लो समय उकालो लाग्ने क्रममा छ । ठिक उल्टो नेपाली फुटबलले भने सफलता हासिल गर्न सकेको छैन । पछिल्लो समय एसियन कप छनोट र एसियाली खेलकुदमा नेपालको प्रदर्शन अपेक्षाकृत हुन सकेको छैन । जारी प्रतियोगिताको पहिलो खेलमा पनि नेपाल पाकिस्तानसँग पराजित भएपछि नेपाललाई थप समस्या परेको छ । भुटान नेपालको यो समस्यालाई अझै जटिल बनाउने प्रयासमा हुनेछ । यसका लागि टोलीसँग बलियो हतियारका रुपमा फरवार्ड चेन्चो ग्याल्सेन रहेका छन् ।

चेन्चो हाल भारतको बेंगलुरु एफसीमा आबद्ध छन् । उनले यसै सिजन मात्र उक्त क्लबसँग अनुबन्धन गरेका थिए । उनले जर्सी नम्बर सात प्रयोग गर्ने हुनाले उनी समर्थकमाझ ‘सि जी ७’ को नामले प्रख्यात छन् । भुटानको फुटबलका नयाँ स्टार उनले दक्षिण एसियाली फुटबलमा आफ्नो बेग्लै पहिचान बनाइसकेका छन् । उनले भुटानको घर्लु फुटबल हुँदै भारतीय फुटबलमा आफुलाई स्थापित गराइसकेका छन् । सम्भवत भुटानको अहिलेसम्मकै सबैभन्दा ठूलो स्टारका रुपमा उनि अगाडी आएका छन् ।

पछिल्लो सिजन उनी भारतको आईलिगमा मिनेर्भा पन्जाबबाट खेलेका थिए । नेपाली राष्ट्रिय टोलीका गोलरक्षक किरण चेम्जोङ र उनले एकै क्लबबाट खेलेका थिए । मिनेर्भालाई लिग उपाधि दिलाउँदा चेन्चो क्लबका सर्वाधिक गोलकर्ता थिए । उनको उत्कृष्ट प्रदर्शनबाट प्रभावित भएर नै बेंगलुरुले उनलाई क्लबमा अनुबन्धन गरेको हो । उनले राष्ट्रिय टोलीका लागि पनि राम्रो प्रदर्शन गर्दै आएका छन् ।

भुटानले समूहको पहिलो खेलमा बंगलादेशसँग २-० को हार बेहोर्दा पनि चेन्चोले केहि मौका पाएका थिए । तर त्यसको सदुपयोग गर्न नसक्दा टोलीले सहजै हार बेहोर्नुपर्यो । भुटानले चेन्चोमाथि धेरै भर गरेको छ र उनलाई अब त्यसको दबाब पनि पारेको छ । उनले अपेक्षा अनुसार नतिजा निकाल्न नेपालविरुद्ध बलियो प्रदर्शन गर्ने सम्भावना छ । नेपालको गोलरक्षक किरणसँग धेरै समय बिताएका कारण पनि उनलाई किरणको कमजोर पक्ष थाहा हुन सक्छ । ठिक उल्टो, किरणलाई पनि चेन्चोबारे राम्रो जानकारी छ ।

चेन्चो मुख्य फरवार्ड अथवा राइट विङ्गसको भूमिकामा अब्बल छन् । नेपाली डिफेन्स पछिल्लो खेलमा केहि फितलो रहेपछि पाकिस्तानले २-१ को जित दर्ता गरेको थियो । भुटानविरुद्ध डिफेन्सले सोहि किसिमको गल्ति दोहोर्याउनु हुँदैन । इतिहास हेर्ने हो भने नेपालले अहिलेसम्म साफ च्याम्पियनसिपमा भुटानविरुद्ध हार बेहोरेको छैन । यहाँसम्म कि बराबरी पनि भएको छैन । सबै खेल जितेको छ । तर चेन्चो नेपालको लागि खतरा बन्न सक्छन् । प्रशिक्षक बालगोपाल महर्जनले डिफेन्सलाई विशेष भूमिका दिएर उनीमाथि नजर राख्न बताउन सक्छन् ।

नेपाल विरुद्ध भुटान : खेलको जानकारी