बार्सिलोना (एजेन्सी) – युरोपमा पाएको सफलताका आधारमा लियोनल मेसीले अझ धेरै च्याम्पियन्स लिग उपाधी जित्न सक्षम रहेको फरवार्ड लुईस सुआरेजले बताएका छन् । बार्सिलोनाका स्टार मेसीले ५ ब्यालोन डी’ओर उपाधी आफ्नो नाम गर्दा चार च्याम्पियन्स लिग सहित ३३ उपाधी जितेका छन् ।

बार्सिलोनामा उनकै सहकर्मी रहँदै आएका सुआरेजले भने, ‘विश्वकप र च्याम्पियन्स लिग पछी मेसी थप उर्जाशील भएका छन् । अहिले उनी हाम्रो कप्तान हुन् र उनी अझ ट्रफी जित्न आतुर छन् । हाम्रो टोली र प्रशिक्षक उच्च स्तरको भएकाले हामी कुनैपनि ट्रफी जित्न सक्षम छौं । च्याम्पियन्स लिग जित्नको लागि धेरै अप्ठेरो प्रतियोगिता हो तर मेसी आफू एक्लै यो प्रतियोगिता जिताउने क्षमता राख्छन् । उनी सहयोगी छन् त्यसैले पनि हामी अझ धेरै बलियो हुन जरुरि छ । ‘

नियमित कप्तान आन्द्रेस इनीएस्टा युरोपियन फुटबल छाडेर जापान गएपछि नयाँ कप्तान बनेका मेस्सीले यस अघि नै यो सिजन आफ्नो टोलीले च्याम्पियन्स लिग जित्न हरसम्भव प्रयास गर्ने बताएका छन् । सुआरेजले भने, ‘उनले हामीलाई राम्रो खेल्न दिएको दवाबको विषयमा चर्चा गर्यौं । तर त्यो दवाबले उनी ट्रफी जित्न कति भोको छन् भन्ने बुझाउँछ ।’

आफ्नो भविष्यको फुटबल करियरका विषयमा बोल्दै उनले भने, ‘ मेरो परिवार खुशी छन् र हामी तेस्रो सन्तानको अपेक्षामा छौं । म त्यो क्लबमा छु जहाँ म हुन खोज्थें । बार्सिलोनामा आएपछि मैले विशेषगरी सन् २०१४ को विश्वकप फुटबलमा जे भएको थियो त्यसपछि धेरै सहयोग पाएको छु । म क्लबलाई सकेसम्म धेरै सहयोग पुर्याउन चाहन्छु। ‘

सुआरेजले थपे , ‘ मलाई थाहा छ बार्सिलोनाबाट सन्यास घोषणा गर्न धेरै गाह्रो काम हो । म खेल्न नसक्ने भएको दिन बिदाई लिनेछु र बार्सिलोनाबाट नै सन्यास लिनु मेरो सपना रहेको छ । ‘