लिस्वन (एजेन्सी) – अन्तर्राष्ट्रिय मैत्रीपूर्ण खेलमा आज राति विश्व उपविजेता क्रोएसियाले पोर्चुगलको भ्रमण गर्दैछ । पोर्चुगल र क्रोएसियाबीचको खेल इस्टेडियो डु अल्गरभमा बिहिबार राति १२ः३०  बजेपछि शुरु हुनेछ ।

गत जुन/जुलाईमा भएको विश्वकप फुटबल पछि पहिलोपटक अन्तर्राष्ट्रिय मैत्रीपूर्ण खेल हुन लागेको हो । यसबीचमा घरेलु क्लब लिगका तीन देखि चार चरणका खेलहरु सकिएका छन् । मैत्रीपूर्ण खेलमा पोर्चुगलबाट कप्तान क्रिष्टियानो रोनाल्डो उपलब्ध हुने छैनन् । पोर्चुगलका प्रशिक्षक फर्नान्डो सान्तोषले रोनाल्डोलाई विश्राममा राख्दै युवा प्रतिभा आन्द्रे गोमेज र गोन्कालो गुइडिजलाई टिममा सामावेश गरेको छ ।

यता विश्व उपविजेता टिम क्रोएसियाले आफ्नो स्टार खेलाडीद्धय कप्तान लुका मोड्रिच र इभान राकिटिकलाई टिममा समावेश गरेको छ । राकिटिकले यही खेलबाट राष्ट्रिय टिमबाट १०० क्याप जित्नेछन् । पोर्चुगलले रोनाल्डोविनाको मैत्रीपूर्ण खेलमा अपेक्षाकृत प्रदर्शन गरिहेका छन् । तर, रोनाल्डोको अनुपस्थिति बलियो क्रोएसियाबीचको खेलमा खड्किन सक्नेछ । प्रशिक्षक फर्नान्डो सान्तोषको टोलीले ११ मध्ये पछिल्ला आठ खेलमा राम्रो गोल औसतमा जित निकालेका छन् ।

सन् २०१८ को तीन मैत्रीपूर्ण खेल क्रोएसियाको लागि भने सुखद रहेको छैन । क्रोएसिया रसिया विश्वकपको फाइनलमा फ्रान्ससँग ४–२ ले पराजित भएको थियो । २०१६ को युरोकप विजेता पोर्चुगल प्रि–क्वाटरफाइनलभन्दा अघि बढ्न सकेको थिएन । पोर्चुगल उरुग्वेसँग २–१ ले पराजित भएको थियो । हेड टु हेडमा पोर्चुगल क्रोएसियामाथि हावी छ । अहिलेसम्म यि दुई टिमले तीन खेलमा प्रतिस्पर्धा गर्दा पोर्चुगलले दुई खेलमा विजयी र एक खेल बरारबरी खेलेको छ ।