जेनिट (एजेन्सी) – युभेन्ट्सको युवा एकेडेमी हुँदै सिनियर टोलीसम्म यात्रा गरेका पूर्व युभेन्ट्स मिडफिल्डर क्लाउडियो मार्चिसियो रसियन क्लब जेनिट सेन्ट पिटर्सबर्गमा २ वर्षे सम्झौतामा अनुबन्धित भएका छन् ।

इटालियन मिडफिल्डर ३२ वर्षीय मार्चिसियोले २५ वर्षे युभेन्ट्स यात्रा टुङ्ग्याउदै रसियन प्रिमियर लिग खेल्ने पिटर्सबर्गमा पुगेका हुन् । उनले युभेन्ट्सबाट ३८९ खेल खेलेका थिए । जसमा मार्चिसियोले युभेन्ट्सबाट ७ पटक सिरी ए लिग र ४ पटक कोप्पा इटालिया जितेका छन् । उनले युभेन्ट्सबाट ३७ गोल गरेका छन् । क्लबले मिडफिल्डमा लिभरपुलका एम्रे च्यानलाई भित्र्याएपछि मार्चिसियोले क्लब छाड्ने निर्णय लिएका हुन् ।

सम्झौतापछि मार्चिसियोले भने, ‘सम्झौतामा कुनै शंका छैन । मलाई यस क्लब मन पर्छ । मलाई महत्त्वकांक्षा मनपर्छ । यूभेन्ट्स छाडेपछि मैले अन्य इटालियन क्लबमा अनुबन्ध नहुने वाचा गरेको छु ।’ पछिल्लो समय इन्जुरीको कारण मार्चि्सियोले आफ्नो खेलको जादु देखाउन सकेका थिएनन् । सन् २०१६ मा घुडाको इन्जुरीले ६ महिना मैदान बाहिर रहेका मार्चिसियोले गत सिजन २० खेल खेलेका थिए ।

मार्चिसियोले यूभेन्ट्सको युथ टोलीबाट सिनियर टिममा डेब्यु गरेको थिए । मार्चिसियो सिनियर टोलीमा सन् २००६ मा पहिल्पतक स्थान पाएका थिए । जतिबेला युभेन्ट्स सिरी ए फुटबलको दोस्रो डिभिजनमा रहेको थियो । मार्चिसियोले इटालीयन राष्ट्रिय टोलीबाट ५५ खेल खेलेका छन् ।