ढाका (हाम्रो खेलकुद) – साविकको विजेता भारतले साफ सुजुकी कपमा विजयी शुरुवात गरेको छ ।  ढाकास्थित बंगबन्धु रंगशालामा बुधबार भएको समूह ‘बी’ को खेलमा भारतले श्रीलंकालाई २–० ले पराजित गर्दै विजयी शुरुवात गरेको हो ।

भारतको जितमा आशिक कुरुनियान र लालियन्जुला चाङ्टेले गोल गरे । साविकको विजेता भारतले खेलको ३५औं मिनेटमा अग्रता बनाएको थियो । बायाँ कर्नरबाट आएको बललाई आशिक कुरुनियानको सहजै गोल गर्दा भारतले १–० को अग्रता बनाएको थियो । दोस्रो हाफको शुरुमै भारतका लालियन्जुलाले गोल गरेपछि भारत खेलमा २–० ले अघि बढेको थियो । त्यसपछि थप गोल निस्कन नसक्दा भारत विजयी हुन सफल भयो ।

जितसँगै भारतले समूह ‘बी’ मा ३ अंक जोडेको छ । जितसँगै भारतले सेमिफाइनल पुग्ने सम्भावना बलियो बनाएको छ । यो समूहमा भारतसँगै श्रीलंका र माल्दिभ्स रहेको छ ।

शनिबार श्रीलंका र माल्दिभ्सबीच खेल हुनेछ । श्रीलंकाले यो खेलमा पनि हार बेहोरे प्रतियोगिताबाट बाहिरिने छ ।

भारत प्रतियोगिताको सर्वाधिक सफल टोली हो । उसले ११ मध्ये ७ प्रतियोगिताको उपाधि जितेको छ । सन् २०१५ मा भएको साफमा भारतले अतिरिक्त समयमा अफगानिस्तानलाई २–१ ले  पराजित गर्दै च्याम्पियन बनेको थियो ।