प्रकाश तिमल्सिना
ढाका – साफ च्याम्पियनसिप (साफ सुजुकी ) कपको पहिलो खेलमा निराशाजनक हार बेहोरेको नेपाली फुटबल टोली आफ्नो समूहको अर्को खेल हेरिरहेको छ । ढाकास्थित बंगबन्धु रंगशालामा समूह एको अर्को खेलमा आयोजक बंगलादेशबीच खेल जारी छ । अन्तिम समयमा सम्हालिन नसक्दा मंगलबार नेपाली टोली पाकिस्तानसँग २–१ ले पराजित भएको छ ।

५ मिनेट इन्जुरी समयको अन्तिम मिनेटमा गोल खादै नेपाल पराजित भएको थियो । इन्जुरी समयमा मुहम्मद अलि निर्णायक गोल गरेका थिए । सदुल्लाहको क्रसमा मुहम्मदले नजिकबाट गोल गर्दै पाकिस्तानलाई जित दिलाएका थिए । त्यसअघि नेपाललाई खेलमा फर्काउने क्रममा विमल घर्तीमगरले ८२ औंमा मिनेटमा खेलमा बराबरी गरेका थिए ।

सन् २०१३ को काठमाडौंमा भएको साफ च्याम्पियनसिपमा पनि पाकिस्तानविरुद्ध इन्जुरी समयमा विमलले बराबरी गोल गर्दै टोलीलाई हार जोगाएका थिए । त्यति बेला नेपालले सेमिफाइनलको यात्रा तय गरेको थियो । त्यसता नेपाल र पाकिस्तानबीच यो पहिलो खेल हो । पाकिस्तानविरुद्ध मंगलबार सुजल श्रेष्ठको कर्नरमा आएको बल परिवर्तित नीराजन खड्काले हेडमार्फत मिलाएपछि विमलले नजिकबाट गोल गरेका थिए ।

६७ औं मिनेटमा नवयुगको ठाँउमा नीराजन मैदान प्रवेश गरेपछि नेपालले दबाब बढाएको थियो । पाकिस्तानले पहिलो हाफमा अग्रता लिएको थियो । त्यसअघि ३६ औं मिनेटमा हसन नविद बसिरको पेनाल्टी गोलमा नेपाल पछि परेको थियो । नेपाली टोली कप्तान विराज विराज महर्जनले महम्मद रिजाजलाई पेनाल्टी बक्समा फाउल गरेपछि पाकिस्तानले पेनाल्टी पाएको थियो । विराजले पहेलो कार्डको दर्शन गरेका थिए । नेपाल अर्को खेल भुटानसँग बिहीबार खेल्नेछ ।