काठमाडौं (हाम्रो खेलकुद) – अखिल नेपाल फुटबल संघ (एन्फा) ले मंगलबारदेखि सुरु हुने साफ च्याम्पियनसिप जितेमा टोलीका प्रत्यक सदस्यलाई ५-५ लाख दिने घोषणा गरेको थियो । खेलाडीहरुलाई बिदाइ गर्ने समयमा गरिएको उक्त घोषणाले खेलाडीको मनोबल उच्च हुने धारणा एन्फाको रहेको छ ।

एन्फा पूर्व अध्यक्ष गणेश थापा ।

यसैबीच एन्फाका पूर्व अध्यक्ष गणेश थापाले भने उक्त पुरस्कार राशी कम भएको बताएका छन् । थापाले सामाजिक संजालमा लेख्दै वर्तमान कार्यसमितिले अहिलेको परिपेक्षमा अझै ठूलो पुरस्कार राशी राख्नुपर्ने बताएका हुन् । थापा अध्यक्ष छँदा सन् २०१३ को साफ च्याम्पियनसिपमा नेपालले उपाधि जिते एन्फाले सबै खेलाडीलाई अपार्टमेन्ट दिने घोषणा गरेको थियो ।  तर नेपाल सेमिफाइनलमा अफगानिस्तानविरुद्ध पराजित हुँदै प्रतियोगिताबाट बाहिरिएको थियो ।

थापाले लेखेका छन्, “साफ सुजुकी कप २०१८ मा सहभागी नेपाली राष्ट्रिय फुटबल टिमलाई सफलताको लागि शुभकामना दिन चाहन्छु । नेपाली राष्ट्रिय फुटबल टिमले साफ च्याम्पियनशिपमा सदैव शसक्त प्रर्दशन गर्दै दावेदारी प्रस्तुत गर्दै आईरहेको सर्वविदितैछ । साफ च्याम्पियनशिपमा विजयी भए विगतमा एन्फाले खेलाडीहरुको प्रोत्साहनका लागि अर्पाटमेन्ट दिने घोषणा गरेको परिप्रेक्ष्यमा वर्तमान एन्फा कार्यसमितिले पनि टिमको उच्च मनोवलका लागि सोही खालको पुरस्कारको घोषणा गर्नेमा आशावादी छु । नेपाली टिमलाई पुनः एक पटक सफलताको शुभ कामना ।”

नेपालले प्रतियोगिताको पहिलो खेलमा आज पाकिस्तानको सामना गर्दैछ । खेल नेपाली समयानुसार दिनको ३:४५ बजे सुरु हुनेछ ।