पोखरा (हाम्रो खेलकुद) – बंगालादेशमा मंगलबारबाट सुरु हुने साफ च्याम्पियनसिपको उपाधि जितेमा पोखरेली खेलप्रेमी तथा व्यवसायी इच्छामान बुद्धाचार्यले नेपाली टिमलाई एक लाख रुपैयाँ दिने घोषणा गरेका छन ।

हंसराज हुलास चन्द एण्ड कम्पनीको बजाज मोटरसाइलका सब डिलर इच्छा शक्ति अटोमोबाइल प्राली पोखराका अध्यक्ष इच्छामानले आफूले नेपाली टिमलाई हौसला प्रदान गर्नका लागि नगद दिने घोषणा गरेको बताए । ‘आफ्नो देशले जहिले पनि जितोस भन्ने चाहेको र प्रोत्साहनका लागि पनि टिमलाई एक लाख दिने घोषणा गरेको हो,’ उनले भने ।

अखिल नेपाल फुटबल संघ (एन्फा) ले यसअघि नै टोलीले उपाधि जितेको खण्डमा जनही ५-५ लाख दिने घोषणा गरिसकेको छ । यसैक्रमम बुद्धाचार्यको यस कदमलाई एन्फा अध्यक्ष कर्मा छिरिङ शेर्पाले पनि प्रशंसा गरेका छन् । अध्यक्ष शेर्पाले सामाजिक संजालबाट बुद्धाचार्यलाई धन्यवाद दिएका छन् ।

सन १९९३ बाट सुरु भएको साफ फुटबलको इतिहास सोही वर्ष नेपालले तेश्रो स्थान हासिल गर्नु बाहेक जितेको रेकर्ड छैन । साफ फुटबल नेपालले सन १९९७ र २०१३ गरि दुइ पटक आयोजना गरिसकेको छ । एन्डोनेसियामा सम्पन्न १८ औं एसियाली खेलकुदमा पराजय संगै फर्केको नेपाली फुटबल टिम बंगालादेशको ढाकामा सुरु हुने साफ फुटबलमा ठोस नतिजा निकाल्ने दाउमा छ ।

समूह ‘ए’ मा रहेको नेपालले मंगलबार पहिलो खेल पकिस्तान संग खेल्दैछ भने दोश्रो खेल भुटान र अन्तिम खेल आयोजक बंगालादेश संग खेल्नेछ ।