टुरीन (एजेन्सी) – पोर्चुगिज स्टार खेलाडी क्रिस्टियानो रोनाल्डो सिजनको सुरुआतमा इटालियन क्लब युभेन्ट्स पुगेका छन् । तर उनको अपेक्षाअनुरुप सुरुआत राम्रो हुन सकेको छैन ।

पाँच पटकका बेलोन डिओर विजेता रोनाल्डो गत साता यूईएफए प्लेयर आफ दि इयरको उपाधि जित्नबाट समेत बन्चित रहेका थिए । यो सिजन सिरी–ए का तीन खेल खेल्दा रोनाल्डोले आफ्नो पहिलो गोल गर्न सकेका छैनन् । ठिक विपरित उनको पूर्वक्लब रियल म्याड्रिडमा भने उनको विकल्पमा हेरिएका खेलाडीले लगातार गोल गरिरहेका छन् ।

यसैक्रममा युभेन्ट्सको यू–९ टिममा डेब्यु गरेका उनका छोरा जुनियर रोनाल्डोले आफ्नो डेब्यु खेलमा चार गोल गरेका छन् । आइतबार इटालियन मिडिया रिपोर्टका अनुसार आफ्नो बुबाको प्रसिद्ध जर्सी नम्बर ७ लगाएका जुनियर रोनाल्डोले लुसेन्टोविरुद्ध चार गोल गरेका छन् । जहाँ यू–९ युभेन्ट्स क्लब ५–१ ले विजय भएको थियो ।

रोनाल्डो सिनियरले युभेन्ट्सका लागि आफ्नो पहिलो तीन खेलमा गोल गर्न सकेनन् । उनको पर्मासँगको तेस्रो खेल हेर्न पोर्चुगलका प्रधानमन्त्रि एन्टोनिओ कोस्टा दर्शकदीर्घामा उपस्थित थिए । उक्त खेलमा युभेन्ट्सले २–१ ले जित हात पारेको थियो । तर रोनाल्डोले गोल गर्न भने सकेनन् । हालसम्म लिगको ३ खेलमा रोनाल्डोले २४ पटक गोलपोस्टमा प्रहार गरेपनि गोलभने हुन सकेको छैन ।