मड्रिड (एजेन्सी) – स्पेनिस ला लिगा फुटबलमा रियल मड्रिडले फराकिलो जित निकालेको छ । रियलले ला लिगामा लगातार तेस्रो जित निकाल्ने क्रममा लेगानेसमाथि ४–१ को फराकिलो जित निकालेको हो ।

रियलको फराकिलो जितमा करिम बेन्जेमाले दुई तथा ग्यारेथ बेल र सर्जियो रामोसले समान एक गोल गरे । लेगानेसका गुइडो कारिल्लोले एक गोल गरे ।

घरेलु मैदान सान्टियागो बर्नबेउमा रियलले १७औं मिनेटमा ग्यारेथ बेलको गोलबाट अग्रता लिन सफल भएको थियो । ड्यानियल कार्भाहलको पासमा बेलको भली प्रहार गोलमा परिणत हुदा लेगानेसका गोलरक्षकले रोक्ने कुनै मौका पाएन ।

तर, रियलको त्यो अग्रता लामो समय टिकेन । २४औं मिनेटमा लेगानेसले पेनाल्टीबाट बराबरी गोल फर्कायो । पेनाल्टी एसियामा क्यासमिरोले विपक्षी खेलाडीमाथि ट्याकल गरेपछि लेगानेसले पेनाल्टीको मौका पाएको थियो । जसमा गुइडो चुकेनन् ।

पहिलो हाफ १–१ गोलको बराबरीमा सकिएको थियो । तर, दोस्रो हाफमा खेलमा पूनरागमन गरेको रियलले थप ३ गोल गर्न सफल भयो । ४८औं मिनेटमा बेन्जेमाले गोल गर्दै रियललाई २–१ को अग्रता दिलाए । मार्काे एसेन्सियोको सुन्दर क्रसमा बेन्जेमाले विपक्षी डिफेन्डरको निगरानीमा रहेपनि गोल गर्न सफल भयो । विपक्षी खेलाडीलाई फल गरेको भन्दै रेफ्रीले शुरुमा गोल नदिएपनि भिएआरको सहायताबाट बेन्जेमाको गोलले मान्यता पायो ।

६१औं मिनेटमा बेन्जेमाले टिमको लागि तेस्रो तथा व्यक्तिगत दोस्रो गोल गरेपछि रियल खेलमा ३–१ ले अघि बढेको थियो । ६६औं मिनेटमा कप्तान सर्जियो रोमोसले पेनाल्टीमार्फत गोल गरेपछि रियलले ४–१ को आरामदायी अग्रता बनायो ।

एसेन्सियोलाई सियोभासले पेनाल्टी बक्समा फल गरेपछि रियलले पेनाल्टी पाएको थियो । त्यसपछि थप गोल गर्न निस्कन नसक्दा रियलले आरामदायी जित निकाल्न सफल भयो । लगातार तेस्रो जितसँगै रियल ९ अंकसहित लिगको शीर्ष स्थानमा छ । लेगानेस १ अंकसहित १९औं स्थानमा छ । ला लिगा अन्र्तगत नै शनिबार राति भएको खेलमा एट्लेटिको मड्रिड सेल्टा डि भिगोसँग २–० ले पराजित भयो । एट्लेटिकालाई पराजित गर्न सेल्टाका म्याक्सीमिलियानो गोमेज र इगो आसपासले गोल गरे ।

जितसँगै सेल्टा ७ अंक जोडेर लिगको दोस्रो स्थानमा उक्लिएको छ । खराव शुरुवात गरेको एट्लेटिको ४ अंकसहित १२औं स्थानमा छ ।