म्यान्चेस्टर (एजेन्सी) – जोसे मोउरिन्होले आफु विश्वकै उत्कृष्ट प्रशिक्षक भएको दावी गरेका छन् । प्रिमियर लिगको जारी सिजनमा खेलेका ३ खेल मध्ये २ मा पराजित भएपछि म्यानचेस्टर युनाइटेडका प्रशिक्षक दवाबमा रहेका छन् ।

गत सोमबार सम्पन्न खेलमा युनाइटेड टोटनह्यामसँग ३-० ले पराजित भएको थियो। र केहि रिपोर्टका अनुसार आइतबारको खेलमा समेत पराजित भएमा मोउरिन्होलाई प्रशिक्षकबाट हटाइने संकेत रहेको छ । टोटनहमविरुद्धको खेलपछि मोउरिन्होले मिडियाबाट सम्मान नपाएको भन्दै पत्रकारहरुको जवाफ दिन समेत मानेका थिएनन् ।

मोउरिन्होले भने, “म विश्वकै उत्कृष्ट एक क्लबको प्रशिक्षक रहेको छु। र संगै म स्वयं विश्वकै उत्कृष्ट प्रशिक्षकमा पनि पर्दछु ‘, उनले थपे, ‘ मैले गत सिजन धेरै सफलता हात पारेको थिएँ तर मिडियाले यो कुरा मान्दैन । म मेरो प्रदर्शनलाई आफैं विश्लेषण गर्छु र मेरो लागि तपाईंले जे सोच्नुहुन्छ त्योभन्दा धेरै म के गर्छु त्यो महत्वपूर्ण छ।”

“दुई सिजनअघि हाम्रो प्रदर्शन उत्कृष्ट थियो र हामीले युरोपा लिग जितेका थियौं । यो सिजन र गत सिजन सबैले एटलेटिको म्याड्रिड उत्कृष्ट छ भनेर सोचेका छन् । तर उनीहरुले च्याम्पियन्स लिगबाट बाहिरीएर उपाधि जितेका हुन् । हामी इंग्ल्याण्डमा युरोपेली टाइटल जित्ने पछिल्लो टोली पनि हौँ ।  म इटाली, स्पेन र इंग्ल्याण्ड गरेर ८ ट्रफी जिताउने एक मात्र प्रशिक्षक हुँ । र सबै ८ उपाधी बलिया प्रतिस्पर्धीविरुद्ध आएका हुन् । मैले यो ठूलो उपलब्धि हासिल गरेको छु तर मलाइ थाहा छ मिडियाले यो मान्न तयार छैन,’ मोउरिन्होले भने ।

यदि युनाइटेडले प्रिमियर नजितेमा पनि तपाईं उत्कृष्ट मध्येको एक प्रशिक्षक नै रहनुहुन्छ भन्ने प्रश्नको जवाफमा मौरिन्होले भने, ” के तपाईं यो प्रश्न प्रिमियर लिगको तेस्रो वा चौथो स्थानमा रहेको क्लबको प्रशिक्षकललाई गर्नुहुन्छ ?” अर्का पत्रकारले योर्गेन क्लोपले त आफ्नो प्रशंसा आफैं गर्दैनन् त भन्ने प्रश्नमा मोउरिन्होले भने, ” किनकि उनी उपाधि जित्दैनन्। “