निम्स (एजेन्सी) –फ्रेन्च लिग वानमा पेरिस सेन्ट जर्मेन (पीएसजी) ले आफ्नो अपराजित यात्रा कायमै राखेको छ । लिग वान अन्तर्गत शनिबार इन्जुरी समयमा तनावपूर्ण बनेको खेलमा पीएसजीले निम्समाथि उसकै मैदानमा ४–२ को जित निकाल्दै लिगमा अपराजित यात्रा कायम राखेको हो ।

पीएसजीको जितमा नेयमार जुनियर, एन्जल डि मारिया, केलियन एमबाप्पे र एडिन्सन काभनीले गोल गरे । पराजित टिमका लागि एन्टोनिन बोबिचन र तेजी साभानिरले गोल गरे । दुवै टिमका खेलाडीले इन्जुरी समयमा रातो कार्ड पाएका थिए । पीएसजीका एमबाप्पेले सामान्य फलमा अनावश्यक नाटक गरेको भन्दै रेफ्रीले दोहोरो कार्ड देखाएर मैदान बाहिर पठाएको थियो । लगत्तै रेफ्रीले साभिनिरलाई पनि रातो कार्ड देखाउदै मैदान बाहिर पठाएका थिए ।

उपाधिका दावेदार पीएसजीले खेलको ३६औं मिनेटमा नेयमारको गोलबाट अग्रता बनाएको थियो । थोमस म्युनियरको पासमा नेयमारले गोल गर्न सफल भएका थिए । ४०औं मिनेटमा एन्जल डि मारियाले गोल गरेपछि पीएसजी पहिलो हाफमा २–० ले अघि बढेको थियो । ६३औं मिनेटमा एन्टोनिनले साडा थिओवको पासमा गोल गरेपछि घरेलु टोली खेलमा फर्किएको थियो ।

७१औं मिनेटमा घरेलु टोलीले पेनाल्टीको मौका पायो । ६८औं मिनेटमा पीएसजीका डिफेन्डर थियागो सिल्भाले विपक्षी खेलाडीलाई फल गरेपछि भिडियो एसिस्टेन्ट रेफ्री (भिएआर) को सहायतामा निम्सले पेनाल्टीको मौका पाएको थियो । जसमा तेजी साभानिर चुकेनन् । खेल बराबरीमा पुगेपछि पीएसजीले थप आक्रमण बुन्दै गोल गर्न सफि रह्यो । ७७औं मिनेटमा एमबाप्पेले गोल गर्दै पीएसजीलाई ३–२ को अग्रता दिलायो । इन्जुरी समयको थप गरिएको दोस्रो मिनेटमा एडिन्सन काभानीले गोल गर्दै पीएसजीलाई ४–२ को जित दिलाए ।

जितसँगै अपराजित रहेको पीएसजीले चार खेलबाट १२ अंक जोडेर लिगको शीर्ष स्थानमा याथवत रहेको छ । पराजित निम्स भने चार खेलबाट ६ अंकसहित पाँचौ स्थानमा छ ।