लन्डन (एजेन्सी) – नवनियुक्त प्रशिक्षक मौरिजियो सार्रीको प्रशिक्षणमा रहेको लन्डन क्लब चेल्सीले इंग्लिस प्रिमियर लिग फुटबलमा लगातार चौथो जित निकालेको छ । प्रिमियर लिग अन्र्तगत शनिबार भएको खेलमा चेल्सीले एफसी बोर्नामाउथमाथि २–० ले विजयी हुदै लगातार चौथो जित निकालेको हो ।

घरेलु मैदान स्टामफोर्ड ब्रिजमा भएको खेलमा चेल्सीलाई जिताउन पेड्रो रोड्रिग्वेज र इडेन हाजार्डले गोल गरे । यो सिजन उच्च प्रदर्शन गरिरहेको चेल्सीले गोलको लागि ७२औं मिनेट कुर्नुपरेको थियो । ७२औं मिनेटमा ओलिभर जिरुको पासमा पेड्रोले गोल गर्दै टिमलाई अग्रता दिलाए ।

८५औं मिनेटमा इडेन हाजार्डले गोल गरेपछि चेल्सीलाई २–० को जित दिलाए । हाजार्डले मार्कोस एलन्सोको पासमा गोल गरेका थिए । केही अवसरलाई चेल्सीले खेर फालेको थियो । चेल्सीले यसअघि हडर्सफिल्ड टाउनमाथि ३–०, आर्सनलमाथि ३–२ र न्यु क्यास्टलमाथि २–१ को जित निकालेको थियो ।

जितसँगै चेल्सीले शीर्ष स्थानमा रहेको लिभरपुलसँग अंक बराबरी गरेको छ । चार खेलबाट समान १२ अंक भएपनि चेल्सी गोलअन्तरमा दोस्रो स्थानमा छ । लिभरपुलले आजै लेस्टर सिटीलाई २–१ ले पराजित गर्दै लगातार चौथो जित दर्ता गर्न सफल भएको थियो । चेल्सीसँग पराजित बोर्नामाउथ पहिलो हारसहित ७ अंक बटुलेर छैटौ स्थानमा रहेको छ । एक खेल भने बराबरीमा सकिएको थियो ।

प्रिमियर लिगका अन्य खेलको नतिजाहरु

लेस्टर सिटीविरुद्ध लिभरपुल (१–२)

ब्राइटन एन्ड होभ अल्वियोनविरुद्ध फुलहम (२–२)

क्रिस्टल प्यालेसविरुद्ध साउथह्याम्पटन (०–२)

एभर्टनविरुद्ध हडर्सफिल्ड टाउन (१–१)

वेस्टह्यामविरुद्ध वल्भरह्याप्टन (०–१)