म्याड्रिड (एजेन्सी) – पोर्चुगल एवं युभेन्ट्स फरवार्ड क्रिस्टियानो रोनाल्डो यस वर्ष यूईएफए वर्षको सर्वोत्कृष्ट खेलाडी अवार्डबाट बन्चित रहे । उक्त अवार्ड बिहीबार मोनाकोमा आयोजित समरोहमा क्रोएसियाका कप्तान एवं रोनाल्डोकै पूर्व सहकर्मी लुका मोड्रिचले जिते ।

त्यसै समारोहमा रोनाल्डोले भने वर्षको उत्कृष्ट फरवार्डको उपाधि उचाल्न सफल रहे । यूईएफए अवार्डमा पछाडी परेका अकारण यस वर्ष ब्यालोन डि ओर उपाधि जित्ने रोनाल्डोको सम्भावना कम छ । रोनाल्डोलाई यूईएफए अवार्डमा २२३ मत मिलेको थियो । जुन संख्या मोड्रिचभन्दा ९० मत कम हो ।

रोनाल्डोको एजेन्ट जोर्गे मेन्डेसले बिहीबार सार्वजनिक भएको युईएफएको समारोहमा मुख्य पुरस्कार विजेता मोड्रिचलाई लक्षित गर्दै जोडदार प्रतिक्रिया दिएका छन् । ‘यो सब हाँस्यास्पद र लाजमर्दो हो । यसमा कुनै दोधार छैन की विजेता रोनाल्डो बाहेक अन्य बन्नलायक थिएनन् ’, मेन्डेसले पोर्चुगल संचार माध्यमसँग कुरा गर्दै यस्तो अभिव्यक्ति दिएका हुन् ।

रोनाल्डोकी बहिनीले पनि यस बारे चिन्तीत प्रतिक्रिया दिएकी छन् । कटिया एभेइरोले पछिल्लो सिजनको रोनाल्डो र मोड्रिचको तथ्याङकलाई तुलना गर्दै इन्स्टाग्राममा एक पोस्ट सार्वजनिक गरेकी हुन् । उनको यो पोस्टले मोड्रीच जितको हकदार नभएको संकेत दिएको थियो । रोनाल्डो असन्तुष्ट रहेका कारण मोनाकोमा आयोजित समारोहमा उपस्थित थिएनन् ।

३३ बर्षीय रोनाल्डो आफू मुख्य पुरस्कार नजित्ने पहिले नै जानकार भएको हुन सक्ने अनुमान गरिएको छ । त्यसैले रोनाल्डोले आफ्नो उपस्थिती जरुरी ठानेनन् । तर, यो समर्थकको लागि भने निराशा जगाउने खबर बनेको छ । रोनाल्डोका पूर्व सहकर्मी मोड्रीच र सर्जियो रामोसले भने रोनाल्डो समारोहमा उपस्थित भएको भए राम्रो हुने बताएका थिए ।