मोनाको (एजेन्सी) – निकै प्रतिक्षा गरिएको सन् २०१८/१९ को च्याम्पियन्स लिगको समूह चरणको खेल तालिका बिहीबार सार्वजनिक भएको छ । समूह चरणको ड्रबाट केहि रोमान्चक र उत्सुक समुह भएसँगै सिर्जना भएसँगै फुटबल समर्थकहरु मुख्य खेलको मिति याद गर्न थालिसकेका छन् । युरोपका ठूला टोली सहभागी हुने यस प्रतियोगितामा  समुह चरणमा यी ५ खेल रोमान्चक बन्ने सम्भावना रहेको छ :

५) एटलेटिको म्याड्रिड विरुद्ध बोरुसिया डर्टमन्ड

यदि एटलेटिको म्याड्रिडले जुन १ मा हुने फाइनलका लागि आफ्नो स्थान बनाउन चाहन्छ भने सुरुवातमा जर्मन टोली बोरुसिया डर्टमन्डको सामना गर्नुपर्नेछ । दुवै टोलीहरु उत्कृष्ट रहेपनि घरेलु लिगमा अर्को ठुलो टोलीको छायाँमा रहँदै आएका छन् । ला-लिगामा एत्केटिको रियल म्याड्रिड र बार्सिलोनाको छायाँमा पर्दै आएको छ भने जर्मन लिगमा बोरुसियाले बायर्नको छायाँमा रहनु परेको छ । दुवै टोली पछिल्लो सिजन अन्तिम १६ मा पर्नबाट चुकेका थिए ।

४) रियल म्याड्रिड विरुद्ध एएस रोमा

रियल म्याड्रिड रहेको समुहमा एएस रोमासँगै सीएसकेए मस्को र भिक्टोरिया प्ल्ज़ेन रहेका छन् । यस समुहमा अन्य टोलीहरु त्यति सशक्त नभएपनि एएस रोमालाई हल्का आँक्नु गलत हुनेछ । पछिल्लो सिजन समेत चेल्सी र एटलेटिको म्याड्रिड रहेको समुहमा रहेको रोमा सबैलाई चकित पार्दै अर्को चरणमा पुगेको थियो । तर रोमाको खेलबाट सारा फुटबल विश्व त्यस समय चकित भयो जब रोमाले बार्सिलोनालाई समग्रमा ४-४ को नतिजा निकाल्दै जित निकाल्यो । अन्त्यमा सेमिफाइनलमा रोमा लिभरपुलसँग पराजित भएको थियो ।

३) बार्सिलोना विरुद्ध टोटनह्याम हट्स्पर

गत सिजन रोमाले बार्सिलोनालाई हराउँदा टोटनह्यामले भने रियल म्याड्रिडलाई टाउको दुखाइ बनेको थियो । बोरुसिया डर्टमुन्ड र रियलसंगैको समुहमा परेपनि टोटनह्याम समुह बिजेता बन्दै अर्को चरणमा पुगेको थियो । अर्को चरणमा भने स्पर्स जुभेन्ट्ससँग पराजित रहेको थियो । यदि लियोनल मेस्सीको बार्सिलोना आफ्नो सबैभन्दा सक्षम खेलमा नरहने हो भने बार्सिलोनाले अर्को पराजय भोग्नु पर्ने हुनसक्छ ।

२) पेरिस सेन्ट जर्मेन विरुद्ध लिभरपुल

योर्गेन क्लोपको आगमनसँगै लिभरपुल अझ बलियो टोली बनेको छ । गत सिजन समेत उपाधिको नजिक पुगेर निराश बनेको लिभरपुलले यस सिजन भने समुह चरणमा नै पेरिस सेन्ट जर्मेनको सामना गर्नेछ । नेईमार, एम्बाप्पे, काभानी रहेको पिएसजीलाई रोक्न लिभरपुललाई कठिन हुनेछ ।

१) युभेन्ट्स विरुद्ध म्यानचेस्टर युनाइटेड

युनाइटेडका लागि १९६ खेल खेल्दै ८४ गोल गरेका क्रिस्टियानो रोनाल्डो युभेन्ट्सबाट युनाइटेडकै विरुद्धमा खेल्न उत्रिने छन् । यस समयभने रोनाल्डोको काँधमा थप जिम्मेवारी थपिएको छ । रियलबाट खेल्दा च्याम्पियन्स लिगमा उत्कृष्ट समय बिताएका रोनाल्डोलाई कडा टक्कर दिन युनाइटेड तयार रहने छ ।