दिपेश तिमल्सिना 

काठमाडौं – नेपाली राष्ट्रिय फुटबल टोलीले आउने दुई बर्ष कुनै पनि अन्तर्राष्ट्रिय प्रतियोगिता खेल्न नपाउने भन्ने विभिन्नअनलाईनको समाचारले सोमबार पाठकमाझ भ्रम सृजना गराएको छ । तर, त्यो समाचारमा कुनै सत्यता भने छैन । खासमा नेपालले दुई बर्ष प्रतियोगिता खेल्न नपाउने नभइ, नेपालको राष्ट्रिय टोलीले खेल्नु पर्ने कुनै पनि प्रतियोगिता अब लामो समय छैनन् ।

खेल्न नपाउने र खेल्ने प्रतियोगिता नभएको बीच अन्तर छ । सञ्चारमाध्यमका यस्ता ससाना कमजोरीले पाठकलाई भ्रम पारिरहेको हुन्छ । नेपालको सिनियर टोलीले खेल्ने आधिकारिक प्रतियोगिता जम्मा दुईवटा मात्र छन् । एउटा दक्षिण एसियाली राष्ट्रको सहभागिता रहने साफ च्याम्पियनसिप र अर्को विश्वकप÷एसियन कप छनोट प्रतियोगिता हो । साफ हरेक दुई बर्ष र विश्वकप÷एसियन कप हरेक चार बर्षमा आयोजना हुन्छ । त्यस हिसाबले नेपालले खेल्नुपर्ने प्रतियोगिताका बीच लामो समयको अन्तर हुनु स्वभाविक छ ।

सन् २०१८ विश्वकप र २०१९ को एसियन कप छनोटका लागि नेपालले गत बर्ष भारतसँग पहिलो चरणको प्रतिस्पर्धा गरेको थियो । गत बर्ष होम एन्ड अवे खेल्दा भारतसँग पराजित भएपनि नेपाल स्वतः विश्वकप र एसियनकप छनोटबाट बाहिरिसकेको छ । अब फेरी तीन बर्षअघि नेपालले विश्वकप÷एसियन कप खेल्नु पर्नेछैन । २०२० को ओलम्पिकको छनोटमा नेपालले भाग लिन सक्छ । तर, त्यो पनि राष्ट्रिय टोलीले नभइ यू २३ ले खेल्ने प्रतियोगिता हो । अर्को साफ च्याम्पियनसिप पनि नेपालले दुई महिनाअघि भारत गएर खेलेर फर्केको थियो । अबको संस्करण २०१७ को अन्त्यतिर बंगलादेशमा आयोजना हुनेछ । त्यसअघि नेपालले खेल्ने औपचारिक प्रतियोगिता छैनन् । यसबाहेक नेपालले अन्तर्राष्ट्रिय मैत्रीपूर्ण खेल भने खेल्न सक्नेछ । तर, त्यो पनि नेपालले चाहेर मात्र खेल्न पाउने छैन । अन्तर्राष्ट्रिय मैत्रीपूर्ण खेलका लागि विश्व फुटबल महासंघ (फिफा) र एसियाली फुटबल महासंघ (एएफसी) सँग पूर्व स्वीकृति लिनुपर्छ ।

‘अन्तर्राष्ट्रिय प्रतियोगिताको आफ्नै तालिका हुन्छ । त्यो कुनै एउटा राष्ट्रको चाहनाले बन्ने होइन, अखिल नेपाल फुटबल संघ (एन्फा) का विकास निर्देशक सञ्जिव मिश्रले भने, दुई राष्टबीच हुने मैत्रीपूर्णका लागि त अन्तर्राष्ट्रिय क्यालेन्डर हेरेर त्यो सँग नजुध्ने गरि राख्नुपर्छ । प्रतियोगिता नभएपछि खेल्ने भन्ने प्रश्नै आउँदैन । नेपालले खेल्न नपाउने होइन, खेल्नु नपर्ने चाही हो । बंगलादेश फुटबल संघले अर्को बर्ष आयोजना गर्ने बंगबन्धु कपमा भने नेपालले खेल्ने सम्भावना छ । तर, अन्तराष्ट्रिय आमन्त्रणका नाममा २० बर्षअघि सुरु भएको बंगबन्धु कप नियमित रुपमा आयोजना भएको इतिहास छैन ।

सन् १९९६ बाट सुरु भएको बंगबन्धु कप २०१६ मा आइपुग्दा जम्मा ४ पटक मात्र आयोजना भएकाले पनि अर्को बर्ष पक्कै आयोजना हुन्छ भन्ने ग्यारेन्टी छैन । भारतमा आयोजना भएको साफ च्याम्पियनसिपको तयारीका सिलसिलामा नेपाल बंगलादेश पुगेका दौरान यो बर्ष नेपालले बंगबन्धु कप खेल्ने पक्का भएको थियो । साफ च्याम्पियनसिपमा लज्जास्पदक हार बेहोर्दै पहिलो चरणबाटै बाहिरिएको नेपालले भारतमै गत साता सम्पन्न १२ औं दक्षिण एसियाली खेलकुद (साग) को तयारीका लागि भन्दै बंगबन्धु कपमा भाग लिएको थियो । चरम निराशाका बीच नेपाली राष्ट्रिय टोलीले बंगबन्धु कपमा भाग लिएको थियो ।

अन्ततः टोली बंगबन्धु कप जितेर फर्केको थियो । विजयी यात्रालाई निरन्तरता दिने क्रममा नेपालको यू २३ टोलीले १२ औं सागको फुटबलमा पनि स्वर्ण जितेको थियो । यू २३ ले खेल्ने साग अब २०१८ मा नेपालले आयोजना गर्ने जिम्मेवारी पाएको छ । तर, साग पछिल्लो पाँच संस्करण तोकिएको समयमा भएको छैन । गत साता मात्र नेपालले २३ बर्षयता सागमा पहिलो पटक स्वर्ण जितेका कारण नेपाली फुटबलमाथि समर्थकको भरोसा बढेको अनुभव गरिएको छ । यस्तो माहौलका बीच नेपालले अन्तराष्ट्रिय प्रतियोगिता खेल्न नपाउने भन्ने भ्रमपूर्ण समाचारले ती समर्थकलाई पुनः निराश बनाउने काम गर्छ ।