काठमाडौं (हाम्रो खेलकुद) – नेपाली राष्ट्रिय फुटबल टोलीको नियमित सदस्य रहँदै आएका विंगर प्रकाश बुढाथोकीले भुटानमा व्यावसायिक फुटबल खेल्ने भएका छन् । उनले यसै सिजन बढुवा भएको पारो एफसीबाट खेल्ने भएका हुन् ।

केहि महिनाअघि मात्र पारो एफसी शीर्ष डिभिजनमा उक्लिएको थियो । पारोलाई शीर्ष डिभिजनमा पुर्याउँदा प्लेअफका दुई खेल खेल्न त्रिभुवन आर्मी क्लबका नवयुग श्रेष्ठ, जर्जप्रिन्स कार्की र जितेन्द्र कार्की भुटान पुगेका थिए । खेलमा पारोले फराकिलो जित दर्ता गरेको थियो ।

प्रकाशले भुटानी क्लबसँग हालका लागि तीन महिनाको सम्झौता गरेका छन् । प्रकाशलाई भुटान लग्न प्रशिक्षक सुगन तन्डुकारले समन्वय गरेका थिए । यसअघि पनि आर्मीका खेलाडी पनि उनकै पहलमा भुटान लागेका थिए ।

प्रकाश पछिल्लो पटक राष्ट्रिय लिगमा थ्री स्टार क्लबसँग आबद्ध थिए । चोटका कारण करियरको अधिकांश समय मैदानबाहिर रहेका उनले दक्षिण एसियाली खेलकुदमा नेपालले स्वर्ण पदक जित्दा महत्त्वपूर्ण भूमिका निर्वाह गरेका थिए । उनले फाइनलमा फ्रिकिक मार्फत गोल गरेपछि नेपालको जितको आधार तय भएको थियो ।

प्रकाशसँगै नेपालको मोफसल फुटबलमा प्रभावशाली प्रदर्शन गर्दै आएका विदेशी डिफेन्डर फ्लोरेन्ट पनि भुटान लागेका छन् । दुवै खेलाडीले पारो एफसीबाट नै खेल्नेछन् ।