फुटबल टोलीमा डिफेन्स भन्दा आक्रमणकै बढी चर्चा रहने गर्छ । कुनैपनि टोलीले सफलता हासिल गर्न खेलमा गोल गर्ने पक्षलाई बढी प्राथमिकतामा राख्ने गर्छन् । सामान्यतया डिफेन्स भन्दा आक्रमणकै खेलाडी महंगा हुन्छन् र दबाब पनि उत्तिकै हुन्छ । त्यस दबाबमा खरो उत्रिएर राम्रो प्रदर्शन गर्न सक्ने खेलाडी नै समर्थकमाझ चर्चित हुन्छन् ।

आक्रमणमा कुनै एक खेलाडीले मात्र क्लबको लागि सबै जिम्मेवारी सम्हाल्न सक्दैन । कुनैपनि टोलीको आक्रमण सफल हुने दुई वा त्योभन्दा बढी खेलाडीको मिलेर बनेको आक्रमण जोडी महत्त्वपूर्ण हुन्छ । पछिल्ला केहि सिजनयता निकै प्रख्यात रहेको बेल, बेन्जेमा र क्रिस्टियानो रोनाल्डो को जोडी (बिबिसी) यसपटक भने टुटीसकेको छ। त्यसपश्चात भने युरोपमा सबल अट्याक क्षमता भएका टोलीमा हेरफेर भएको छ।

युरोपका केहि क्लब जसको आक्रामक जोडी निकै प्रख्यात छ :

१) पेरिस सेन्ट जर्मन

पेरिस सेन्ट जर्मनको अट्याक धेरै मजबुत मानिन्छ। नेयमार, काभानी र विश्वकप विजेता एम्बाप्पेको तिकड़ीलाइ रोक्न विपक्षिलाई धेरै गाह्रो हुन सक्छ ।  पछिल्लो समय इब्राभिमोभिचको छायाँमा परेका काभानीले आफुलाई नम्बर ९ खेलाडीको रुपमा चर्चित बनाइस्केका छन् । फ्रेन्च लिगमा यो टोलीलाई टक्कर दिन सक्ने अरु टोलीको क्षमता कमै भएपनि पिएसजीको परिक्षा भने च्याम्पियन्स लिगमा हुनेछ ।

२) लिभरपुल

मोहम्मद सलाह, रोबर्टो फिर्मिनो र साडियो मानेको अग्रपंक्तिमा रहेको लिभरपुल आक्रामक पक्षमा मजबुत देखिएको अर्को एक टोली हो । आफ्नो पक्षमा रहेको बललाई तुरुन्त अगाडी बढाएर गोल गर्न सक्नु लिभरपुलको खास क्षमता हो । विङ्गसबाट सलाह र मानेको सहयोगमा फिर्मिनोको फिनिशले लिभरपुललाई अझ सशक्त बनाएको छ । यस सिजन क्लबले आफ्नो अग्रपंक्ति सुधार्न शकिरीलाई समेत टोलीमा लिएको छ ।

३) बार्सिलोना

लियोनल मेस्सी, फिलिप्पे कौटिन्हो र लुईस स्वारेजको मिश्रणले बार्सिलोनालाई खतरनाक टोली बनाएको छ । प्रशोधन गरिएको मदिरा जस्तै मेस्सी र स्वारेज हरेक सिजन अझ निखारींदै गएका छन् । यस्तै ब्राजिलका कोउटिन्हो पनि क्लबमा आएसँगै प्रदर्शन सुधार्दै गएका छन् । उनी लामो दुरीबाट गोल हान्न माहिर छन् । ओस्माने डेम्बेले र आर्टुरो भिडालको सहयोगले टोलीलाई अझ मजबुत बनाउने छ ।

४) म्यानचेस्टर सिटि

अन्य क्लबमा नपाइने आक्रामक गहिराइ पेप गवार्डीओलाको सिटिमा पाउन सकिन्छ । सर्जियो अग्युरो, ग्याब्रियल जेसस, केभिन डी ब्रुएन, डेभिड सिल्भा, रहिम स्टरलिङजस्ता ठूला नामहरु यस टोलीमा समावेश छन् । चोटका कारण नियमित खेलाडी बाहिर रहँदा भने कुनै समय समस्या उत्पन्न हुन् सक्छ । यसका लागि लेरोय साने, बर्नार्डो सिल्भा, रियाद माहरेज जस्ता खेलाडीको उपस्थितिले समस्या सुल्झाउने सम्भावना बढ्दो छ ।

सम्मानजनक उल्लेखहरु :

रियल म्याड्रिड : रोनाल्डोको अभाव खड्किन सक्ने टोलीले बेलमाथी धेरै बोझ थोपरेको छ । यद्यपी टोलीमा बेन्जेमा, इस्को, मोड्रीच जस्ता खेलाडीभने रहेका छन् । यो सिजन भाज्केज र एसेन्सियो पनि अगाडी आउनुपर्छ ।

एटलेटिको म्याड्रिड : विश्वकप विजयी एन्टोनियो ग्रिज्मेनको टोलि म्याड्रिडमा उनीसंगै थोमस लेमर, एन्जेल कोर्र्याको उपस्थिति रहेको छ । डिएगो कोस्टा, कोके र साउलले पनि आक्रमणमा साथ दिनेछन् ।

बायर्न म्युनिख : गोल मेसिन रोबर्ट लेवान्डोस्कीसँगै थोमस मुलर, आर्जेन रोबेन, फ्रान्क रिबेरीको टोलि म्युनिख समेत सशक्त छ । यस टोलीमा हामेस रोड्रीग्वेज, थियागोको उपस्थितिले अझै सन्तुलन बढेको छ ।

युभेन्ट्स : इटालियन क्लब युभेन्ट्स पनि रोनाल्डो पुगेसँगै केहि बलियो देखिएको छ । आक्रमणमा रोनाल्डो, पाउलो डिबाला र मारियो मान्जुकीचको जोडी जम्ने देखिन्छ । उनीहरुलाई डग्लस कोस्टा, क्वाड्राडो, बर्नार्डेसकी लगायत खेलाडीले साथ् दिनेछन् ।