ओल्ड ट्राफोर्ड (एजेन्सी) – इंग्लिस प्रिमियर लिग फुटबलमा आज राति एकमात्र खेल हुदैछ । उपाधिको दावेदार म्यानचेस्टर युनाइटेडले घरेलु मैदानमा टोटनह्यामको आतिथ्यता गर्दैछ । खेल नेपाली समयअनुसार राति १२ः४५ बजे शुरु हुनेछ । सिजनको शुरुवातमा म्यानचेस्टर युनाइटेडले राम्रो शुरुवात गर्न सकेको छैन ।

घरेलु मैदानमा लेस्टर सिटीमाथि २–१ को संघर्षपूर्ण जित निकालेको म्यानचेस्टर युनाइटेले लिगको आफ्नो दोस्रो खेल ब्राइटन होभ अल्वियोनसँग ३–२ ले गुमाएको थियो । त्यसैले युनाइटेड टोटनह्यामविरुद्धको खेलमा संयमित भएर खेल्दै तीन अंक लिने योजनामा हुनेछ । युनाइटेडमा एलेक्सिस सान्चेज, नेमान्जा मेटिक र एन्टेनियो भ्यालेन्सिायाको आगमनले टिम मजवुत बनेको छ ।

तर, टोटनह्यामलाई पराजित गर्न त्यति सहज भने हुनेछैन । प्रिमियर लिगका शुरुवाती दुवै खेलमा जित हात पारेर उत्साहित बनेकधो टोटनह्याम घरेलु टोली म्यानचेस्टर युनाइटेडलाई स्तब्ध पार्दै लिगमा लगातार तेस्रो जित निकाल्ने योजनामा हुनेछ । टोटनह्यामले न्यु क्यासल युनाइटेड र फुलहमलाई पराजित गरेको थियो । टोटनह्यामसँग ह्यारी केन र डेल अलीजस्ता खेलाडीहरुको साथ छ ।

राम्रो खेलिरहेका ह्युङ मिन सनको अनुपस्थिति टोटनह्यामलाई महँगो पर्न सक्नेछ । घरेलु मैदानमा टोटनह्यामविरुद्ध २६ खेल खेल्दा युनाइटेडले २१ खेलमा जित हात पारेको छ । दुई हार र तीन बराबरीको नतिजा छ । प्रिमियर लिगका तेस्रो चरणको खेल सकिदा लिभरपुल, चेल्सी र वाटफेर्डले समान ९ अंक जोड्दै शीर्ष तीनमा रहेका छन् ।