पेरिस (एजेन्सी) – विश्व फुटबलको स्टार खेलाडीद्द्वय ब्राजिलीयान फरवार्ड नेयमार र फ्रेन्च केलियन एमबाप्पेबीच कुनै मनमुटाव नरहेको डिफेन्डर थोमस म्युनियरले बताएका छन् । पेरिस सेन्ट जर्मेन पीएसजीका स्टार खेलाडी नेयमार र एमबाप्पेबीच पछिल्लो समय आन्तरिक मनमुटाव रहेको खबर बाहिर आएको सरासर झुट रहेको पीएसजीकै म्युनियरले बताएका हुन् ।

‘नेयमार र एमबाप्पेमा कुनै प्रतिद्वन्द्वीता छैन । उनीहरुले टिमबाट उत्कृष्ट लयमा खेलिरहेका छन् । गोलका लागि एक अर्कालाई सहयोग गरेका छन् । उदहारणको रुपमा एन्जर्समाथिको ३–१ को सहज जितलाई लिन सकिन्छ ।’ बेल्जियमका म्युनियरले भने, ‘दुवै खेलाडी आ–आफ्नो ठाउँमा उत्कृष्ट छन् । उनीहरुले एकले अर्कालाई आदर गर्ने गर्छन । फ्रान्स विश्वविजेता बनिसकेपछि टिनेज एमबाप्पे स्टार बनिसकेका कारण यो चुनौती नेयमारले सामना गर्न सक्छ कि सक्दैन भन्ने उनीहरु दुईबीचको अन्तरको कुरा मिडियाले ल्याएको हो ।’

‘प्रतिद्वन्द्वी ?’ यो त केवल पत्रिका बेच्न रचिएको हो । ‘उनीहरु दुवै उत्कृष्ट खेलाडी हुन् । उनीहरुमा अन्य खेलाडीमा भन्दा अलि बढी क्षमता छ । हाम्रो क्लबमा उनीहरु जस्ता धेरै स्टार खेलाडी छन् । हामीले आनन्दित महसुस गरिहेका छौं । नेयमारबहाना केलियन केही फरक छन् । उनी केहि शान्त स्वोभावका छन् ।’