पछिल्लो एक दशक क्रिस्टियानो रोनाल्डो र लिओनेल मेसीले ब्यालोन डी’ओर उपाधिमा वर्चस्व कायम गरेका छन् । यी दुई खेलाडीबाहेक वर्तमान समयमा प्रतिभावान खेलाडी पनि थुप्रै छन् । केहि खेलाडी यस्ता छन् जसले फरक क्लबमा खेलेको अवस्थामा आफ्नो प्रदर्शन सुधार गर्न सक्छन् र उक्त व्यक्तिगत उपाधिमा अझै बलियो दावेदारी प्रस्तुत गर्ने क्षमता राख्छन् ।

यदि फरक क्लबका लागि खेल्ने हो भने यी ५ खेलाडीले यो अवार्ड आफ्नो नाम गर्न सक्छन् :

५) ह्यारी केन (टोटनहम हट्सपर) :

इंग्ल्याण्डका कप्तान ह्यारी केन विश्वकै उत्कृष्ट गोलकर्ता खेलाडी मध्येका एक हुन् । पछिल्लो कहि वर्षमा दुईपटक गोल्डेन बुट हात पारेका केनले प्रिमियर लिगमा पृथक परिचय बनाएका छन् । रुस विश्वकपमा समेत उत्कृष्ट प्रदर्शन गर्दै गोल्डेन बुट जितेका केनले टोटनहमका लागि पछिल्ला १ सय ८९ खेलमा १ सय ३६ गोल गरेका छन् । तर व्यक्तिगत रुपमा उत्कृष्ट प्रदर्शन गरेपनि आफ्नो टोलीले उपाधि जित्न विफल रहँदा केन ब्यलोन डी’ओरको उपाधि हात पार्न बाट बन्चित भएका छन् ।

४) एन्टोइन ग्रिजमन (एटलेटिको म्याड्रिड ) :

एटलेटिको म्याड्रिडका फरवार्ड ग्रिजमन अहिलेको समयका उत्कृष्ट मध्येका एक फरवार्ड हुन् । आफ्नो टोलीका लागि उनले २ सय ९ खेलमा १ सय १२ गोल गरेका छन् । उनले आफ्नो टोलीका लागि केहि उपाधि जिताएपनि ला-लिगामा रियल म्याड्रिड र बार्सिलोनाको दबाबका कारण उनी ब्यालोन डी’ओर जित्नबाट अझै बन्चित छन् । सन् २०१६ को उत्कृष्ट पुरष खेलाडीको विधामा उनी रोनाल्डो र मेस्सीपछि तेस्रो स्थानमा थिए ।

३) पल पोग्बा (म्यानचेस्टर युनाईटेड ) :

यो सुचिमा रहेका अर्का एक विश्वकप विजेता खेलाडी हुन् पल पोग्बा । गत सिजन आफ्नो क्षमता अनुसार प्रिमियर लिगमा प्रदर्शन नगरेपनि रुसमा सम्पन्न विश्वकपमा उनको प्रदर्शन धेरै राम्रो रहेको थियो । २५ वर्षीय फ्रान्सेली मिडफिल्डरले ११ गोल र १४ एस्सिटलाई पछिल्ला २ सिजनमा आफ्नो नाम गरेका छन् । उनको उपस्थितिले कुनैपनि टोली थप बलियो बन्न सक्छ । यस सिजन बार्सिलोना जाने उनको खबर सही प्रमाणित भएमा भने ब्यालोन डी’ओरको अवार्ड जित्ने उनको आशा समेत पुरा हुन सक्छ ।

२) नेयमार (पेरिस सेन्ट जर्मेन) :

सन् २०१७ को अवार्डमा नेयमार रोनाल्डो र मेसीपछि तेस्रो स्थानमा रहेका थिए । उनी उत्कृष्ट भएपनि रोनाल्डो र मेसीको तहभने चुम्न सकेनन् । कीर्तिमानी मूल्यमा पेरिस सेन्ट जर्मेन पुगेका उनको यस बर्ष ब्यालोन डी’ओर जित्ने आशा असम्भव सावित भैसकेको छ । तर यदि वर्तमान फुटबलमा यदि मेसी र रोनाल्डोपछि कसैको नाम आउँछ भने त्यो नेयमारकै हुन्छ ।

१) इडेन हजार्ड (चेल्सी) :

रुसमा सम्पन्न विश्वकप फुटबलमा आफ्नो टोली बेल्जियमलाई तेस्रो स्थान दिलाउन हजार्डको भूमिका महत्त्वपूर्ण थियो । प्रतियोगितामा सफल बनेका उनले ३ गोल गर्दा २ एसिस्ट समेत कमाएका थिए । प्रिमियर लिगको अन्तिम २ सिजनमा उनले २८ गोल गर्दा ९ असिस्ट गरेका छन् । सन् २०१५ मा ब्यालोन डी’ओरको रेसमा आठौँ स्थानमा आउन बाहेक उनले खास उपलब्धि हासिल गरेका छैनन् । चेल्सीका यी खेलाडी यस समय उत्कृष्ट लयमा रहेका छन् । तर चेल्सीमा रहेर नै यो अवार्ड जित्नु हजार्डलाई असम्भवप्राय हुन सक्छ।