म्यानचेस्टर (एजेन्सी)-  दोस्रो रोजाइका गोलरक्षक ब्राभो घाइते भएपछि म्यानचेस्टर सिटीले लोनमा नेदरल्यान्ड्सको क्लब पुगेका १९ बर्षीय गोलकिपर एरो म्युरीचलाई क्लबमा फिर्ता बोलाएको छ । डच साइड क्लब एनएसी ब्रेडामा एक वर्षका लागि आवद्ध भएका म्युरीचलाई दोस्रो रोजेका गोलकिपर क्लाउडियो ब्राभो प्रशिक्षणमा घाइते भए पछि क्लबमा फिर्ता बोलाइएको हो ।

चिलीका कप्तान समेत रहँदै आएका ब्राभो सोमबार प्रशिक्षणका क्रममा घाइते भएका थिए । उनी एडरसन पछिको पहिलो रोजाइका खेलाडी थिए । ३५ वर्षीय ब्राभो बिहिबार मेडिकल परिक्षणका लागि बार्सिलोना प्रस्थान गरेका छन् । उनी केही महिना मैदान बाहिर रहन सक्नै अनुमान गरिएको छ । सिटीले ट्रान्सफर विन्डो बन्द हुनुअघि मात्र इंग्ल्यान्डका गोलरक्षक जो हार्टलाई बर्नली पठाएको थियो । अर्का युवा गोलरक्षक गन पनि सिटी छाडेका थिए ।

मोन्टेनेग्रोका यु–२१ खेलाडी म्युरीच एक सिजन लामो लोनमा गएपनि सिटीको मागसँगै फर्किएका छन् । उनी बिहिबार क्लब आएर शनिबार प्रिमियर लिगमा वल्भसविरुद्ध हुने खेलमा उपलब्ध हुने बुझिएको छ । म्युरीच सन् २०१५ मा स्विटजरल्यान्डको ग्रासहोपरबाट सिटी पुगेका थिए । पछिल्लो सिजन उपाधि जित्दा उनी क्लबका लागि तेस्रो रोजाइका गोलकिपर थिए ।

ब्राभोको चोट गम्भीर भएको अवस्थामा क्लबले जनवरीमा नयाँ गोलरक्षक ल्याउने सम्भावना पनि बढ्ने छ । एडरसन एक्लै पुरै सिजन एक्लै खेल्न फिटनेसको हिसाबले पनि कठिन हुनेछ । म्युरीच उच्च स्तरमा पहिलो रोजाईका लागि तयार नभएको अवस्थामा सिटीले नयाँ खेलाडी अनुबन्धन गर्न सक्छ ।