पेरिस (एजेन्सी)- फ्रान्सेली क्लब पेरिस सेन्ट जर्मेन (पीएसजी) क्रोएसिया तथा बार्सिलोनाका मिडफिल्डर इभान राकीटिचका लागि ९० मिलियन युरो तिर्न तयार भएको छ । यसअघि बार्साले इभानलाई कसैले आफ्नो क्लबमा अनुबन्ध गर्न चाहे १२५ मिलियन युरो मुल्य तिर्नु पर्ने भन्दै मूल्य तोकेको थियो ।

पिएसजी हाल इभानलाई क्लबमा अनुबन्धन गर्न अगाडी सरेको खुलेको छ । क्रोएसियाको आश्चर्यजनक विश्वकप प्रदर्शनमा इभानले आफ्नो टिम फाइनल पुर्याउनका लागि महत्वपुर्ण योगदान दिलाएका थिए । ३० बर्षीय मिडफिल्डरका लागि पिएसजीले बार्सासँग प्रारम्भिक छलफल  सुरु गर्ने बताइएको छ । तर, बार्सा यस प्रस्तावको स्वीकार गर्छ या गर्दैन त्यो भने खुलेको छैन् ।

केहि दिनअघि मात्र बार्साले इभानको मुल्य १२५ मिलियन युरो तोकेको थियो । इभानको बार्सामा अझै तीन वर्ष सम्झौता बाँकी छ । उनको सम्झौता सन् २०२१ सम्मको रहेको छ । ३० बर्षीय इभानको बजार मुल्य अबको केहि वर्षमा घट्न सक्ने अनुमान गरिएको छ । त्यसैले पनि बार्साले यो प्रस्तावलाई स्वीकार गर्न सक्ने छ । उनले क्रोएसिया राष्ट्रय टिमबाट यसै बर्ष मात्र ११ खेल खेले ।

सन् २००७ मा राष्ट्रिय टिममा डेब्यु गरेका उनले हाल सम्म ९९ खेल खेली सकेका छन् । २००५ बाट व्यवसायिक फुटबल खेल्न थालेका इभानले ला लिगाका मात्र ८ सिजन खेले । सन् २०१४ मा सेभिल्ला बाट उनी बार्सिलोना पुगेका थिए । उनले हाल सम्म बार्साबाट लिगका मात्र १३५ खेल खेलेका छन् । गत सिजनको ला लिगामा उनले ३५ खेल खेलेका थिए । पिएसजीले पछिल्लो सिजन बार्साबाटै नेयमारलाई किर्तिमानी मुल्यमा अनुबन्ध गरेको थियो ।