काठमाडौं (हाम्रो खेलकुद) – साफ च्याम्पियनसिप २०१८ यहि भदौ १९ देखि बंगलादेशमा हुँदैछ । जापानी प्रशिक्षक ग्योतोकु कोजी भिसा समस्याका कारण नेपाल प्रवेश गर्न नपाउँडा नेपाली राष्ट्रिय फुटबल टोलीको प्रशिक्षकको जिम्मा बालगोपाल महर्जनले पाएका छन् ।

बालगोपाल र बंगलादेशको फुटबलमा निकै लामो सहयात्रा रहेको छ । सन् १९९३ मा नेपालले ढाकामा आयोजित दक्षिण एसियाली खेलकुदमा स्वर्ण पदक जित्दा महर्जन टोलीका सदस्य थिए । त्यसपछि सन् २००० को दशकमा महर्जनले पटक पटक स्थानीय क्लब ब्रदर्स युनियनका लागि व्यवसायिक फुटबल खेले । उनलाई त्यहाँ त्यसबेलाको राम्रै रकममा अनुबन्ध गरिएको थियो ।

सन् २०१६ मा बालगोपाल महर्जन नै प्रशिक्षक हुँदा नेपालले बंगबन्धु गोल्डकप जितेको थियो । अहिलेजस्तै त्यसबेला पनि प्रशिक्षक र एन्फाको खिचातानी बढ्दा बालगोपालले टोलीको जिम्मेवारी पाएका थिए । उनले टोलीलाई अपराजित रहँदै उपाधि दिलाए । उनको प्रदर्शनले प्रभावित भएर ब्रदर्स युनियनले उनलाई क्लबको प्रशिक्षकमा पनि नियुक्त गरेको थियो ।

यसपटक पनि बालगोपाल अन्तिम समयमा प्रशिक्षक भएका छन् । अहिले टोलीमा सम्मिलित अधिकांश खेलाडी युवा अवस्थामा बालगोपालकै प्रशिक्षणमा हुर्किएका छन् । विगत तीन महिनादेखि राष्ट्रिय टोलीका सहायक प्रशिक्षक रहँदै आएका बालगोपालले टोलीको कमजोर पक्ष पनि राम्ररी बुझेका छन् । नेपालले समूह चरणको पहिलो खेलमा पाकिस्तानको सामना गर्दैछ । त्यसपछि भुटान र आयोजक बंगलादेश नेपालसँग भिड्नेछन् ।