बार्सिलोना (एजेन्सी) – क्याटलान क्लब बार्सिलोनाले पेरिस सेन्ट जर्मेन (पिएसजी) को नजरमा परेका क्रोएसियाली मिडफिल्डर इभान राकिटिचको मूल्य तोकेको छ । बार्साले कुनै क्लबले इभानलाई लिन चाहे १२५ मिलियन युरो तिर्नुपर्ने तोकेको हो ।

पिएसजीले आफ्नो टिम बलियो बनाउन चाहे ठुलो रकम तिर्नै पर्ने बाध्य बनाएको छ । पिएसजीले इभान र सर्जीओ बुस्केट्सलाई यसै साता आफ्नो क्लबमा भित्र्याउन कसरत गरिरहेको बुझिएको थियो । ३० बर्षीय इभानका लागि बार्साले १२५ मिलियन युरोको मुल्य तोके पनि पिएसजी भने १०० मिलियन युरो पर्याप्त हुने आशा गरिरहको छ ।

क्रोएसियाका लागि रुसमा सम्पन्न विश्वकपमा गरेको उनको प्रदर्शनले मिडफिल्डरको मुल्य अझै बढाएको छ । इभानले विश्वकपमा उत्कृष्ट प्रदर्शन गर्दै आफ्नो टिमलाई फाइनल सम्म पुर्याएका थिए । उनले क्रोएसिया राष्ट्रय टिमबाट यसै बर्ष मात्र ११ खेल खेले । २००७ मा राष्ट्रिय टिममा डेव्यु गरेका उनले हाल सम्म ९९ खेल खेलिसकेका  छन् ।

२००५ बाट व्यवसायिक फुटबल खेल्न थालेका इभानले ला लिगामा ८ सिजन खेले । सन् २०१४ मा सेभिल्ला बाट उनी बार्सिलोना पुगेका थिए । उनले हाल सम्म बार्साबाट लिगका मात्र १३५ खेल खेलेका छन् । गत सिजनको ला लिगामा उनले ३५ खेल खेले । दुवै टोलीले ३१ अगष्टमा ट्रान्सफर विन्डो बन्द हुनु अघिसम्म यो फैसला गरि सक्नु पर्ने छ ।