काठमाडौं (हाम्रो खेलकुद)– दुई सातापछि बंगलादेशमा सुरु हुने साफ च्याम्पियनसिपमा नेपाली फुटबल टोलीको प्रशिक्षणको जिम्मेवारी कसलाई दिने भन्ने विषयमा अखिल नेपाल फुटबल संघ (एन्फा) अन्तरिक छलफलमा जुटेको छ ।

राष्ट्रिय टोलीका नियमित प्रशिक्षक जापानी ग्यातुको कोजी भिसा नभएका कारण नेपाल आउन नपाएपछि एन्फाले उनको ठाँउमा प्रशिक्षक कसलाई राख्ने भन्ने विषयमा छलफलमा रहेको प्रवक्ता किरण राईले हाम्रो खेलकुदलाई जानकारी दिएका छन् ।

इन्डोनेसियामा जारी फुटबलको समूह चरणबाटै बाहिरिएको यू २३ टोली सोमबार राती स्वदेश फर्कदा कोजी आएनन् । नेपालको भिसा नभएका कारण उनी नआएका हुन् । इन्डोनेसिया जानुअघि नै उनको भिसा भएको अवधि भन्दा बढी नेपाल बसेका थिए । त्यसमा एन्फाले जरिवाना तिरेको थियो ।

नयाँ प्रक्रिया सुरु भएपनि भिसा प्राप्त नभइसकेकोले कोजी नेपाल नआएको राईले बताए । ‘उहाँ अहिले नेपाल आउन पाउनु हुन्न । हामीले उहाँ इन्डोनेसिया जानुअघि नै नयाँ भिसाका लागि प्रक्रिया थालिसकेका थियौं,’ प्रवक्ता राईले भने,‘ अहिले सम्म भिसा आएको छैन । एन्फा र युवा तथा खेलकुद मन्त्रालयबाट प्रक्रिया अघि बढेको छ । तर, स्वीकृत भएको छैन ।’

उनका अनुसार कोजी इन्डोनेसियाबाट थाइल्यान्ड गएका छन् । भदौ १९ देखि बंगलादेशमा सुरु हुने साफ च्याम्पियसिपमा कोजीलाई बोलाउने नबोलाउने विषयमा पनि छलफल भइरहेको राईले बताए । कोजीलाई प्रशिक्षण टोलीमा प्रशिक्षक बालगोपाल महर्जनले साथ दिइरहेका छन् ।

एन्फाका उपाध्यक्ष कृष्ण थापाको संयोजकत्वमा रहेको टेक्निकल कमिटिसँगको छलफल पछि नयाँ प्रशिक्षक नियुक्त गर्ने वा अरु विकल्पमा जाने भन्ने निर्णय गरिने राईले जानकारी दिए ।

साफ च्याम्पियनसिपका लागि नेपाली टोलीको केहि दिनमा प्रशिक्षण सुरु हुने बताइएको छ । एसियाडमा सबै तीन खेल गुमाउँदै नेपाली युवा टोली स्वदेश फर्केको थियो ।

इन्डोनेसिया जानुअघि टोलीले थाइल्यान्डमा दुई अभ्यास खेल खेलेको थियो । जसमा सिनियर टोलीका केही खेलाडी सामेल थियो । एन्फाले साफ च्याम्पियनसिपका लागि अन्तिम नामावली सार्वजनिक गर्न बाँकी रहेको छ ।