एसियाड फुटबल – कतारलाई हराउँदै बंगलादेश नकआउटमा

काठमाडौं (हाम्रो खेलकुद) – समूह चरणको अन्तिम खेलमा कतारलाई पराजित गर्दै बंगलादेश १८औं एसियाली खेलकुदको पुरुष फुटबलको नकआउट चरण प्रवेश गरेको। छ। समूहको पहिलो खेलमा उजबेकिस्तानसँग ३-० ले पराजित बंगलादेशले दोस्रो खेलमा थाईल्याण्डलाई १-१ को बराबरीमा रोकेको थियो।

आइतबार पकन्सरी रंगशाला सम्पन्न समूह ‘बी’ अन्तर्गत आफ्नो तेस्रो खेलमा कतारविरुद्ध १-० को जित निकाल्दै बंगलादेश अन्तिम १६मा स्थान बनाउन सफल भएको हो। खेलको इन्जुरीसमयमा जमल भुइयानले निर्णायक गोल गर्दै बंगलादेशलाई अर्को चरणमा पुर्याउन मद्दत गरे। कतार भने समूहको पुछारमा रहँदै बाहिरिएको छ।

नेपालले भने समूह चरणको अन्तिम खेलमा पाकिस्तानसँग पराजय भोगेपछि समूहको पुछारमा प्रतियोगिता अन्त्य गर्यो। समूह चरणको सुरुवाती दुई खेलमा नेपाल जापानसँग १–० र भियतनामसँग २–० ले पराजित भएको थियो ।