यानचेस्टर (एजेन्सी) – इंग्लिस प्रिमियर लिग फुटबलमा आइतबार म्यान्चेस्टर सिटीले हडर्सफिल्ड टाउनमाथि फराकिलो जित हासिल गरेको छ । सर्जियो अगुएरोको ह्याट्रिकसँगै सिटीले घरेलु मैदानमा टाउनलाई ६–१ ले हराएको छ । सिटीका लागि गाब्रिएल जेसस र डेभिड सिल्भाले पनि गोल गर्दा अर्को गोल आत्मघाती भएको थियो ।

सुरुवातबाट खेल नियन्त्रणमा राखेको सिटीका लागि अगुएरोले २५ औं मिनेटमा पहिलो गोल गरे । जेससले ३० औं मिनेटमा गोल गरे भने अगुएरोले ३५ औं मिनेटमा अर्को गोल गरे । टाउनका लागि ४३ औं मिनेटमा जोन गोरेन्क स्टान्कोभिकले गोल गरे ।

४८ औं मिनेटमा सिल्भाको गोलबाट सिटीले ४–१ को अग्रता बनायो । अगुएरोले ७५ औं मिनेटमा गोल गदै ह्याट्रिक पुरा गरे । ८४ औं मिनेटमा टाउनका टेरेन्से कोन्गोललेले आत्मघाती गोल गरेपनि सिटीको जित थप फराकिलो बनेको थियो । साविक विजेता समेत रहेको सिटीले सिजनको पहिलो खेलमा आर्सनललाई २–० ले हराएको थियो ।

वाटफोर्डको जित
बनर्ली – प्रिमियर लिगकै अर्को खेलमा वाटफोर्डले बनर्लीलाई ३–१ ले हराएको छ । वाटफोर्डको जितमा आन्द्रे ग्रे, ट्रोए डेनिइ र विल ह्युग्स ले गोल गरे । बर्निलका लागि घरेलु मैदानमा टर्कोक्सीले गोल फर्काएका थिए ।

खेलको तेस्रो मिनेटमा ग्रेको गोलबाट वाटफोर्डले अग्रता लिएपनि त्यसको तीन मिनेट नबित्दै बर्निलका लागि टर्कोक्सीले गोल फर्काएका थिए । पहिलो हाफ १–१ को बराबरीमा टुंगिएपनि ४८ औं मिनेटमा वाटफोडका लागि डेनिइले गोल गरे । त्यस्तै ५१ औं मिनेटमा ह्युग्सले गोल थपेका थिए ।