काठमाडौं (हाम्रो खेलकुद) – १८औं एसियाली खेलकुद (एसियाड) अन्तर्गतको पुरुष फुटबलमा नेपालले आज समूह चरणको अन्तिम खेलमा पाकिस्तानको सामना गर्दैछ ।  नेपाल र पाकिस्तानबीचको खेल प्याट्रिओट चन्द्रभागा स्टेडियममा स्थानिय समयअनुसार ४ः४५ बजेपछि सुरु हुनेछ ।

समूह चरणको शुरुवाती दुई खेलमा जापानसँग १–० र भियतनामसँग २–० ले पराजित भएको नेपाल समूह चरणको अन्तिम खेलमा पाकिस्तानलाई पराजित गर्दै समूहको उत्कृष्ट तेस्रो टोली बनेर अघि बढ्ने योजनामा हुनेछ । पाकिस्तानविरुद्धको खेल नेपालका लागि इतिहास बनाउने अवसर पनि हुनेछ । नेपालले एसियाडमा खेलेका कुनैपनि खेलमा अहिलेसम्म जित हात पार्न सकेको छ्रन ।

समूह चरणमा कमजोर देखिएको पाकिस्तानलाई पराजित गर्दै नेपाल इतिहास बनाउने लक्ष्यमा हुनेछ । पाकिस्तान समूह चरणका भियतनामसँग ३–० र जापानसँग ४–० ले पराजित भएको छ । त्यसैले समूहमा सबैभन्दा कमजोर देखिएको पाकिस्तानलाई हराउन सके नेपालले एसियाली खेलकुदमा इतिहास बनाउनेछ।

Nepal’s Bishal Rai,center, battles for the ball with Japan’s Kouta Watanabe,left, and Japan’s Koji Miyoshi,right, during their men’s soccer match at the 18th Asian Games at Wibawa Mukti Stadium in Cikarang ,Indonesia, Tuesday, Aug. 14, 2018. (AP Photo/Tatan Syuflana)

नेपालले एसियाडमा १७ खेलमा ६८ गोल खाँदा केवल १ गोल गर्न सकेको छ ।  नेपालले सन् १९८२ को एसियाली खेलकुदमा पहिलोपटक फुटबलमा प्रतिस्पर्धा गरेको थियो । भारतको नयाँ दिल्लीमा भएको प्रतिस्पर्धाले नेपालले समूह चरणका तीनै खेलमा हार बेहोरेको थियो । पहिलो खेलमा कुवेतविरुद्ध वाइबी घलेले गोल गर्दै इतिहास बनाएका थिए । त्यसपछि नेपालले एसियाडमा गोल नै गर्न सकेको छैन । त्यसैले आज हुने पाकिस्तानविरुद्धको खेल नेपाली फुटबलको लागि नयाँ इतिहास बनाउने महत्वपूर्ण अवसर हुनेछ ।