लन्डन (एजेन्सी) – बेल्जियम तथा चेल्सीका विंगर इडेन हाजार्डलाई चेल्सीका मुख्य प्रशिक्षक माउरिजिओ सार्रीले युरोपकै उत्कृष्ट खेलाडीमध्यका एक  भएको बताएका छन् । यदि उनले युरोपकै उत्कृष्ट खेलाडी बन्न चाहे उनी उत्कृष्ट खेलाडी बन्न सक्ने सार्रीले बताएका हुन् ।

‘हामी अब युरोपको सबै भन्दा उत्कृष्ट खेलाडी मध्य एकको बारे कुरा गर्दै छौ,’ सार्रीले भने, ‘तर, मेरो सुझावमा उनी अझै आफुलाई सुधार गर्न र पहिलो खेलाडी बन्न सक्ने छन् । यदि उनले आफ्नो दिमागमा निर्भर रहँदै उत्कृष्ट टेक्निक स्किल र उत्कृष्ट स्कोरमा ध्यान दिए ।’ हाजार्ड चेल्सीमा छ वर्षदेखि निरन्तर लयमा छन् । जो लियोनल मेस्सी र क्रिस्टियानो रोनाल्डोसँग तुलना गर्न सकिने छ ।

हाजार्डले विश्वकपमा गरेको मजबुत प्रदर्शन यस सिजन प्रिमियर लिगमा पनि निरन्तरता दिने आशा गरिएको छ । २७ वर्षीय हाजार्ड चेल्सीमा आफ्नो प्रिमियर लगको सातौं सिजनको सुरुआत गर्दै छन् । उनले दुई पटक प्रिमियर लिग जितेका छन् । उनले रुस विश्वकपमा बेल्जियमलाई सेमिफाइनल सम्म पुर्याउन महत्त्वपूर्ण भूमिका खेलेका थिए ।

रुस विश्वकपमा बेल्जियमलाई तेस्रो स्थान दिलाएका उनले एक नयाँ चुनौतिका लागि तयार रहेको संकेत दिएका छन् । हाजार्डलाई रियलले पछ्याइ रहेको थियो । तर, उनी यो सिजन चेल्सीमै बस्ने बताएका छन् । उनको चेल्सीमा अझै दुई बर्षको सम्झौता बाँकी रहेको छ ।